ڕێگا نه‌درا مامۆستا حه‌سه‌ن سه‌لاح سۆران له‌ شوێنی له‌دایکبوونی به‌خاک بسپێردرێت

ته‌رمی مامۆستا حه‌سه‌ن سه‌لاح سۆران، به‌ به‌شداری هه‌زاران کوردستانی له‌ شاری بۆکان به‌ خاک سپێدرا. به‌ڵام کاربه‌ده‌ستانی ڕژیمی ئێران ڕێگه‌یان نه‌دا که‌ ته‌رمی مامۆستا سۆران، له‌ شوێنی له‌ دایک بوونی، واتا له‌ گوندی سارووقامێش به‌ خاک بسپێردرێت.

به‌ گوێره‌ی ئه‌و ده‌نگوباسانه‌ی که‌ له‌ شاری بۆکانی ڕۆژهه‌ڵاتی کوردستان به‌ ده‌ستمان گه‌یشتووه‌، دوابه‌دوای گه‌ڕاندنه‌وه‌ی ته‌رمی مامۆستا حه‌سه‌ن سه‌لاح سۆران بۆ شاری بۆکان،له‌ په‌نای گڵکۆی چه‌ندین که‌سایه‌تی ناوداری ئه‌ده‌ب و هونه‌ری گه‌له‌که‌مان به‌ خاک سپێدرا.

سه‌ره‌ڕای پێداگری بنه‌ماڵه‌ی مامۆستا حه‌سه‌ن سه‌لاح سۆران، هێزه‌کانی ڕژیم به‌ به‌هانه‌ی ڕه‌وشی ئاسایشی، ڕیگه‌یان نه‌دا که‌ ته‌رمی مامۆستا سۆران له‌ گوندی سارووقامیش به‌ خاک بسپێردرێت.
له‌ ڕێ و ڕه‌سمی ناشتنی ته‌رمی مامۆستا سۆران دا هه‌زاران که‌س به‌شدار بوون و به‌ هه‌زاران کوردستانیش، به‌ مه‌به‌ستی سه‌ره‌خۆشی، له‌ شاری بۆکان و شاره‌کانی ده‌وروبه‌ری، سه‌ردانی بنه‌ماڵه‌ی ناوبراو ده‌که‌ن.