لە كەركوك دژی سیاسەتی داگیركاری ئێران و توركیا خۆپیشاندان دەكرێ

رێكەوتی 24\8\201 كاتژمێر چوار و نیوی سەر لە ئێوارە لە گۆرەپانی مامە ریشەی گەڕەكی شۆریجەی شاری كەركوك خۆپیشاندانێكی جەماوەری دژی سیاسەتی داگیركاری ئێران و توركیا بەر ێوەچوو،ئەو خۆپیشاندانە لەلایەن جەماوەرێكی بەرفراوانی كەركوك و 21 پارت و رێكخراوی مەدنی و ژنان سازدرابوو، بە هۆی كێشەی تێكچوونی ئامیری گەورە كردنی دەنگ(مكبرە) بەیاننامەی هەموو حزب و لایەنەكانی ئامادەبوو نەخوێندرایەوە ، بەڵام بە ئامادەبونی كەنالێكی زۆری راگەیاندن توانرا دەنگی ناڕەزایەتی جاماوەر بەرزبكرێتەوە، شایانی وتنە بۆ رسوا كردنی تۆباران و بوردومانی وڵاتی ئێران و توركیا سەرلەبەیانی هەمان رۆژی 24\8\2011 لە بارەگای كەركوكی حزبی زەحمەتكێشانی كوردستان كۆبونەوەیەكی بەرفراوان بۆ 9 پارتی كوردستانی كەركوك بەرێوەچوو، بە ئامادە نەبوونی هەردوو لایەنی پارتی و یەكێتی، كە هەرچەندە بانگێشتی ئەو كۆبوونەوەیە كرابوون، بەشداری نەبوونی هەردوولایەنی پارتی و یەكێتی نارەزایەتی لای حزبە كوردستانیەكان دروست كردبوو، تا رادەیەك بەرپرسی حزبیكی كوردستانی كە نەیویست ناوی بهێنرێت گوتی ئەو دووسەڵاتە هیچ كاتێك ئامادەنین بەشداری لە گەل لایەنەكانی تری دەرەوەی خۆیان بكەن ، بەڵام كاتێك كاریان پێمان دەبێت بۆ ریكلام و بەرژەوەندی خۆیان بانگێشتمان دەكەن، بۆیە دەبی لەمەودا هەڵویستی خۆمان بە هەردوو لایەنی دەسەڵات رابگەێینین، لە مەیدانی خۆپیشاندانی مامە ریشەی كەركوك وەك پەیامنیری رۆژنامەوانی پرسیاریًكم ئاڕاستەی چالاكوان و رۆشنبیری شاری كەركوك هاورێ تالیب كرد لەمەڕ ئامادەنەبوونی پارتی و یەكێتی لەو كۆبوونەوە جەماوەرییەی دژی سیاسەتی جینۆسایدی وڵاتی ئێران و توركیا بەرێوەچوو لە وەڵامدا وتی" ئەو لایەنانەجاران لەسەردەمی شاخ پیویستیان بە خەڵك و جەماوەر هەبوو، ئێستا لە شێوەی كۆمپانیایان لە بەرژەوندی خۆیان دەگەڕێین، دەبێ میللەت بەدوایان بكەوێت، پێویستیان بەجەماوەر نەماوە، هەر ئەم سیاسەتە وای كردووە داگیركران بەكەمی سەیری كورد بكەن.