سوید: ژیانی ته‌مه‌ن 21 ساڵ ده‌بێته‌ قوربانی شه‌ره‌ف

كچه‌ كوردێكی ته‌مه‌ن 21 ساڵ كه‌ پێشتر له‌ باشوری كوردستانه‌وه‌ له‌گه‌ڵ بنه‌ماڵه‌كه‌ی رووی له‌ سوید كردبوو، به‌ده‌ستی باوکی  ته‌مه‌ن 62 ساڵ له‌شاری کاترینه‌ هۆڵمی سوید به‌ چه‌قۆ ده‌كوژرێت. رۆژنامه‌ی (aftonbladet) چاپی سوید هه‌واڵی مه‌رگی ژیانی ته‌مه‌ن 21 ساڵ به‌م شێوه‌یه‌ ده‌گێڕێته‌وه‌ "ئه‌و پیاوه‌ی كه‌ ژیانی كوشتوه‌ ته‌مه‌نی 62 ساڵه‌. ئه‌م بنه‌ماڵه‌یه‌ ماوه‌ی 7-8 ساڵ له‌مه‌وپێش له‌ باشوری كوردستانه‌ووه‌ روویان له‌ وڵاتی سوید كردوه‌.
ژیان له‌ راستیدا دایك ‌و باوكی خۆی له‌ شه‌ڕدا له‌ده‌ستده‌دا‌وه‌ به‌ هۆی ئه‌وه‌ی خزمی ژنی بكوژه‌كه‌ی بووه‌ له‌ لایه‌ن ئه‌و خێزانه‌وه‌ وه‌ك منداڵی خۆیان قبوڵ ده‌كرێت‌و گه‌وره‌ی ده‌كه‌ن.
به‌ پێی رۆژنامه ‌سویدییه‌كه‌ پاشان ئه‌م كچه‌ شوو به‌ پیاوێك ده‌كات، كه‌ 11 ساڵ له‌خۆی گه‌وره‌تر بووه ‌‌و پاش ماوه‌یه‌ك كورێكی لێی ده‌بێت. ساڵی رابردوو لێك جیا ده‌بنه‌وه‌.
رۆژی دووشه‌ممه‌ی هه‌فته‌ی رابردوو كاتێك كه‌ مناڵه‌كه‌ی بۆ باخچه‌ی ساوایان ده‌بات، باوكی كچه‌كه‌ له‌ده‌ره‌وه‌ی باخچه‌كه‌ چاوه‌ڕوانی ده‌بێت پاشان به‌ چه‌قۆ ده‌یكوژێت‌و یه‌كسه‌ر خۆی ده‌داته‌ ده‌ست پۆلیس‌و دان به‌ تاوانه‌كه‌یدا ده‌هێنێت.