ئازا حسیب هێرش ده‌كاته‌ سه‌ر ڕۆژ تیڤی‌ پارتیش هه‌وڵده‌دات هێمن میرانی‌ و حسن احمد له‌ لێدوانه‌كانیان په‌شیمان بكاته‌وه‌

له‌و كۆڕه‌دا كه‌ سه‌نته‌ری‌ سه‌رنج سازی‌ كردبوو بۆ سێ‌ په‌رله‌مانتاری‌ كوردی‌ له‌ په‌رله‌مانی‌ توركیا ، هه‌ریه‌ك له‌ حسن ئه‌حمه‌د و هێمن میرانی‌ پرسیاریان له‌و سێ‌ په‌رله‌مانتاره‌ كرد له‌سه‌ر بارودۆخی‌ ئێستای‌ توركیاو چۆنیه‌تی‌ سیاسه‌ت كردنی‌ ئه‌وان له‌ناو توركیادا ئه‌گه‌رچی‌ به‌پێی‌ به‌دواداچوونه‌كانی‌ سایتی‌ ستانده‌ر میدیاكانی‌ توركیا ده‌قی‌ كۆڕه‌كه‌یان وه‌رگێڕابوو بۆ سه‌ر زمانی‌ توركی‌ به‌ڵام كاتێك قسه‌ی‌ ئه‌م دوو شاره‌زایه‌ی‌ دۆسیه‌ی‌ توركیا بڵاوده‌كرێته‌وه‌ ئه‌ندامانی‌ په‌رله‌مانی‌ توركیا له‌سه‌ر لیستی‌ كوردی‌ و كوردانی‌ باكور و به‌شداربووانی‌ كۆڕه‌كه‌ زۆر نیگه‌ران بوون ، بۆ دڵدانه‌وه‌یان هێمن میرانی‌ و حسن احمد له‌ ڕونكردنه‌وه‌یه‌كدا ڕه‌تیان كرده‌وه‌ كه‌ ئه‌وان دژی‌ ئه‌ندامانی ده‌ته‌په‌ قسه‌یان كردبێت.
ئه‌مه‌و په‌یامنێرمان له‌ هه‌ولێر پێی ڕاگه‌یاندین كه‌ كاسیه‌تی‌ ڤیدیۆیی‌ تۆماركراوی‌ كۆره‌‌كه‌ی‌ بینیوه‌ كه‌ حسن ئه‌حمه‌د و هێمن میرانی‌ هێرشیان كردۆته‌ سه‌ر ده‌ته‌په‌ و په‌كه‌كه‌ و ئۆجه‌لان، په‌یامنێری‌ ستانده‌ر ئه‌وه‌شی‌ بینیوه‌ كه‌ ئازاد حسیب قه‌ره‌داغی‌ به‌ نوێنه‌رایه‌تی‌ مه‌كته‌بی‌ ڕاگه‌یاندنی‌ پارتی‌ ئاماده‌ی‌ كۆڕه‌كه‌ بووه‌ و هێرشێكی‌ نایاسایی‌ كردۆته‌ سه‌ر ته‌له‌فیزیۆنی‌ ڕۆژ تیڤی‌.
به‌پێی‌ ئه‌و زانیاریانه‌ی‌ ده‌ست ستانده‌ر كه‌وتووه‌ پارتی‌ زه‌ختی‌ كردۆته‌ سه‌ر هێمن میرانی‌ و حسن احمد بۆ ئه‌وه‌ی‌ له‌ قسه‌كانیان په‌شیمان بنه‌وه‌ به‌ڵام ئه‌وان ئه‌وه‌ ڕه‌تده‌كه‌نه‌وه‌.
له‌ په‌یوه‌ندییه‌كی‌ ته‌له‌فۆنیدا هێمن میرانی‌ ئه‌وه‌ی‌ ڕه‌ت كرده‌وه‌ كه‌ ئه‌وان هێرشیان كردبێته‌ سه‌ر ده‌ته‌په‌و په‌كه‌كه‌ ، ناوبراو وتی‌: ئێمه‌ قه‌ت هێر‌ش ناكه‌ینه‌ سه‌ر برایانمان له‌ باكور به‌ڵكو ڕاگه‌یاندنی‌ توركیا ئه‌و قسانه‌ی‌ ئێمه‌ی‌ به‌هه‌ڵه‌وه‌ بڵاوكردۆته‌وه‌.