بارودۆخی ته‌ندروستی ده‌میرباش خراپه‌

24 کاتژمێر ره‌وشی ته‌ندروستی سیاسه‌تمه‌دار و شاره‌وانی ناوچه‌ی سووری سه‌ر به‌ دیاربه‌کر تا دێ خراپتر ده‌بێ و بۆ چاره‌سه‌رکردنی نه‌خۆشیه‌که‌ی ئه‌مڕۆ ره‌وانه‌ی نه‌خۆشخانه‌یه‌کی ئه‌سته‌نبوڵ کرا.

له‌لێدوانێکی تایبه‌ت به‌ 24 کاتژمێردا، عه‌بدوڵا ده‌میرباش سه‌باره‌ت به‌ دۆخی ته‌ندروستی خۆی رایگه‌یاند: ئه‌و نه‌خۆشیه‌ی من شتێکی تازه‌ نییه‌ و ماوه‌یه‌کی زۆره‌ له‌گه‌ڵمدایه‌.

گوتیشی: نه‌خۆشیه‌که‌م نه‌خۆشی خوێنه‌ و بۆماوه‌ییه‌. هه‌رچه‌ند به‌رده‌وام ده‌رمان به‌کار دێنم به‌ڵام تا دێ مه‌ترسیدارتر ده‌بێ. دکتۆره‌کان به‌کارهێنانی ده‌رمانه‌کانیش به‌ مه‌ترسی ده‌زانن.

عه‌بدوڵا ده‌میرباش که‌ له‌میانه‌ی ئۆپه‌راسیۆنه‌کانی که‌جه‌که‌دا له‌ لایه‌ن ده‌وڵه‌تی تورکیاوه‌ قۆڵبه‌ست و دادگایی کرا، له‌ به‌ر نه‌خۆشیه‌که‌ی نه‌خرایه‌ گرتووخانه‌ و هاوکات بڕیاری ئازاد کردنی درا.