ئه‌نفال و جه‌للاد

جه‌للاد ، دڵی نه‌بوو ..

كاسه‌ی سه‌ری

ده‌باخانه‌ی سه‌گ و گورگ و

توله‌ و تانجی گه‌ڕو گول بوو ..

له‌ هه‌مان ده‌مدا

پانتایی عه‌رشی شه‌یتان بوو ..

جه‌للاد ، ته‌ره‌سێكی

جنێو فرۆش ..

زۆڵێكی بێ‌ ناسنامه‌

گه‌وادێكی ، بێده‌رگابوو ..

له‌وه‌ش به‌دتر

پێخاوسێكی

به‌ ڕقی كورده‌وه‌ ئاوس بوو ..

كه‌ ده‌تره‌كی ، توته‌له‌كانی

ده‌میان له‌لاشه‌ی بێگیانی

بێناز كه‌وتوو

سه‌رنگومبووی

كورد ده‌ژه‌نی ..

حه‌په‌ی ئه‌وان

بێده‌نگی بیابانی عه‌رعه‌ر و

نوگره‌سه‌لمانی ده‌هه‌ژان ..

ئازارو ژان

هاواری كوردی بێ‌ شوان ..

زیڕه‌ی منداڵی

دایك له‌ تینوانا مردوو ..

زیندوی لاشه‌ هه‌نجن هه‌نجن بوو ..

باوك كوژراو

خوشك و برا له‌ چاڵكراو ..

به‌كوێ‌ گه‌یی ..؟

كێ‌ ئه‌م هاواره‌ی بیست ..؟

كێ‌ تێگه‌یی ..؟

له‌ زه‌رده‌خه‌نه‌ی ئه‌ومنداڵه‌ی

له‌سه‌ره‌ی

زینده‌به‌چاڵكردندا ڕاوه‌ستاوه‌ ..

یان ئه‌وه‌یان ، كه‌سه‌ری پێچاوه‌ ..

ئه‌و ڕیزه‌یان كه‌ده‌ڵێی

خۆڵ و دۆیان به‌سه‌ردا كراوه‌ ..

ئه‌و پیاوه‌ش كه‌

له‌گه‌ڵ خه‌ما تێكئاڵاوه‌ ..

ئه‌و خانمه‌ی

كۆرپه‌كه‌ی له‌ڕێدا له‌ده‌ستداوه‌ ..

هاوارێكن ..

هێشتا ماون ..

له‌ڕوی زۆردارا وه‌ستاون..