سه‌گه‌که‌ی داریکه‌لی

ساڵی 1919
که‌ ئینگلیزه‌کان ده‌ربه‌ندی بازیانیان داگیر کرد
شێخ مه‌حمودیان به‌ برینداریی له‌ په‌نا به‌رده‌قاره‌ماندا ده‌ستگیر کرد
به‌ به‌رچاوی ئه‌وه‌وه‌ ئاگریان به‌ زیندوییی له‌ ژماره‌یه‌ک به‌ردا
48 که‌سیان له‌ رۆڵه‌ی کورد کوشت
ژماره‌یه‌ک بازرگان و خۆفرۆشان
ده‌ست له‌سه‌ر سنگ
له‌ پێشوازیی داگیرکه‌ردا
چاویان خسته‌ سه‌ر پێڵاو
له‌ سلێمانی سوپای ئینگلیز
مه‌کته‌به‌که‌ی کاک ئه‌حمه‌دی شێخیان سوتاند
که‌وتنه‌ کوشتنوبڕینی وڵاتپارێزان
ناپاکانیان پاداشت کرد
خه‌له‌و خه‌رمانیان سوتاند
ئنجا چونه‌ سه‌ر ماڵه‌که‌ی شێخی نه‌مر
هه‌موو شتێکیان برد به‌ تاڵان
ته‌نها سه‌گێگ نه‌بێت نه‌ڕۆی له‌گه‌ڵیان
هه‌تا له‌شکر له‌ چاو ون بوو
هه‌موو توانایه‌کی سه‌رف کرد
بۆ وه‌ڕین و په‌لاماردان.
به‌ کورتییه‌که‌ی به‌م چیرۆکه‌
ئه‌مه‌وێت ئه‌وه‌تان پێ بڵێم:

من ئه‌زانم نه‌ قسه‌کان
نه‌ وشه‌کانم هیچ ئه‌گۆڕن
حه‌پ حه‌پ هه‌ر
وه‌ڕینن
به‌س ئه‌مه‌وێت وه‌ڕینێک بن
وه‌ک وه‌ڕینی سه‌گه‌که‌ی داریکه‌لی
بۆ
زێدێک بن نه‌ک بۆ ئێسقان.