سپیکردنەوەی مێژووی لاهور تاوانبارە چاکەت شینە کراس سپییەکە لە لایەن ڕەحمان غەریب و عەزیز ڕەئووفەوە

(کاتێک لە چاوەکانیم ڕوانی بەهەشتم بەدی کرد، کاتێک لە دەستەکانیم ڕوانی میهرەبانیم بەدی کرد). ئەمە ڕەنگە تەنزێکی تاڵ بێت، بەڵام بەداخەوە بووەتە وێناکردنێکی واقیعی بۆ تێڕوانینی هەندێک لەو نووسەر و ڕۆژنامەنووسانەی کە تا دوێنێ خۆیان بە قوربانیی دەستی دەسەڵات دەزانی و ئەمڕۆش لەسەر شانۆی دادگا، جەللادەکانی دوێنێمان بۆ دەکەن بە پاڵەوان و فریادڕەس.

دیسان ئەم رۆژنامەنووسانە رێژە بە قسەکانیان دەدەن و وامان لێدەکەن کە بڕوا بە بوونی ئەو مۆتەکەیە نەکەین کە تا فوێنێ دەسەڵاتی هەبوو بەسەر سنگمانەوە بوو، تا وەها تێێبڕوانین و بڵێێن کە:

کاتێک بە سەر زەویدا دەڕۆشت هەستت دەکرد خوایەک یاخوود پەیامبەرێک دەڕوات ، ئەو پەیامی ئاشتی و تەبایی پێبوو

ئەو دوێنێ کە فەرمانی بە هێزە دەمامکدارەکان دەکرد و  خۆپیشاندەرە بێ چەکەکانی دەکوشت ، دەیزانی ئەم خۆپیشاندەرانە تێکدەرن

ئەو دوێنێ کە دژە تیرۆر و دەزگای زانیاری و کۆماندۆی بۆ  ئێمە دەنارد دەیزانی گەر وا نەکات و ڕوتمان نەکاتەوە و فلیممان پێ دەرنەکات و بە زیندووی نەمان سوتێنێت و کارەبامان لێنەدات ئەوا کاروانی میهرەبانی و ئاشتیەکەی تێکدەدەین

کاتێک مرۆڤ بەسەر زەویدا دەڕۆیشت، بە خوێندنەوەی وتارەکانی ئەم دواییەی کەسانێکی وەک ڕەحمان غەریب و عەزیز ڕەئوف، هەست دەکات (خوایەک یان پەیامبەرێک) بە پەیامی ئاشتی و تەباییەوە هاتووەتە خوارەوە. بەڵام با بپرسین: ئەم (ماندێلایەی کورد) لە ڕابردوودا کێ بوو؟ بۆچی ئەمڕۆ قەڵەمەکان هەوڵی سڕینەوەی بیرەوەرییە تاڵەکانی میللەتێک دەدەن؟

لە دانیشتنی دادگای ڕۆژی ٧ی ئایاری ٢٠٢٦ ، کە تێیدا لاهور شێخ جەنگی و هاوڕێکانی لەسەر کەیسی هەوڵی تیرۆرکردنی پاڤڵ و قوباد تاڵەبانی دادگایی دەکران ، بینەری دیمەنێکی سەیر بووین. ڕەحمان غەریب بە جۆرێک وەسفی لاهور دەکات کە گوایە بە (ڕووخسارێکی گەشەوە) خۆی کردووە بە هۆڵەکەدا و هەمووان بۆ پێشوازی لە (سڵاوە گەرمەکەی)بە پێوە وەستاون. لە لایەکی تریشەوە، عەزیز ڕەئوف بە جۆرێک دەتوێتەوە لە وەسفکردنیدا کە پێی وایە لاهور (جوست و چالاک و شیک و دەم بەخەندەیە) بە چاکەتێکی شین و قەمیسێکی سپییەوە.

عەزیز ڕەئوف باس لەوە دەکات کە کاتێک چاوی بە چاوی لاهور کەوتووە، (سوپاسگوزارییەکی) تێدا بینیوە، وەک ئەوەی لاهور پێی بڵێت (سوپاس کە بەرامبەر ئەو غەدرەی لێمکراوە بێدەنگ نەبووی). ئەمە هەمان ئەو درامایەیە کە تۆی بەڕێز ئاماژەت پێداوە؛ ئەو نووسەرانەی دوێنێ سکاڵایان لە سەرکوتکردن دەکرد، ئەمڕۆ وەک (سەماکارێکی سەر شانۆ)بە شان و باڵی لاهوردا هەڵدەدەن.

ئەوەی جێگای پێکەنین و هاوکات گریانە، ئەوەیە کە ڕەحمان غەریب، لە ساڵانی سەردەمی دەسەڵاتی ڕەهای لاهور و دەزگاکانیدا، لیستی پێشێلکارییەکانی بڵاودەکردەوە ، کە چەند ڕۆژنامەنووس لەلایەن هێزەکانەوە لێدراون یان داریان تێدا شکێنراوە ، ئەمڕۆ ئەو ڕابردووەی لەبیر کردووە.

ئایا لەبیریان چووە کە ئەم (پەیامبەری ئاشتییە) دوێنێ چۆن فەرمانی بە هێزە دەمامکدارەکانی دژە تیرۆر و زانیاری دەکرد بۆ سەرکوتکردنی خەڵکی؟. مێژوو زۆر نزیکە؛ لەبیر کەس نەچووەتەوە کە هێزەکانی دژە تیرۆری سەر بە لاهور و پۆڵادی برای، چۆن هەڵیان دەکووتایە سەر ماڵی هاوڵاتیان، بەبێ بڕیاری یاسایی ماڵیان دەپشکنی، ژن و منداڵیان دەترساند،  تەنانەت تۆمەتی هەڵگرتنی "ماددەی هۆشبەر" و "یۆرانیۆم"یان بۆ خەڵکی بێتاوان دروست دەکرد بۆ ئەوەی ماڵ و موڵک و سەیارەکانیان داگیر بکەن. بەپێی وتەی قوربانییەکان، لە زیندانەکانیاندا پێیان وتراوە ئەگەر "چەند دەفتەر دۆلارێک" بدەن، ئازاد دەکرێن.

ئەو لاهورەی کە ئەمڕۆ لە دادگا داوای دادپەروەری و یاسا دەکات، بۆ خۆی و بنەماڵەکەی ساڵانێک لە سەرووی هەموو یاساکانەوە بوون. ئەوان  بانگەشەی ئەوەیان دەکرد یەکێتی حیزبێکی بنەماڵەیی نییە، کەچی تەواوی جومگە هەستیارەکانیان قۆرخ کردبوو.

• پۆڵاد شێخ جەنگی: فەرماندەی دژە تیرۆر بوو.

• ئاکۆ و ئاسۆ: لە دەزگای زانیاری باڵادەست بوون.

• هیوا شێخ جەنگی: سەرپەرشتی کۆمپانیاکان و دارایی دەکرد.

تەنانەت کاتێک کوڕە 15 ساڵانەکەی ئاوات خانی خوشکی لاهور (کە بە دەمانچەکەی لاهور مامۆستا ئەمریکییەکەی لە سلێمانی کوشت)، کەیسەکەیان داخست بۆ ئەوەی لاهور تێوەنەگلێت و ئابڕوویان نەچێت. ئایا کاتێک کاوە گەرمیانی تیرۆر کرا، ئەم دەزگایانە (کە زانیاری تەواویان لەسەر ڕووداوەکە هەبوو یان تێیدا تێوەگلا بوون) کاریان بۆ سەروەری یاسا دەکرد؟.

ئەو شەڕەی نێوان لاهور و پاڤێل، کە پێشتر لە 8ی مانگی حەوتی 2021 لە سلێمانی ڕوویدا و ناویان نا (کۆدەتا) ، هەروەک کاک کەمال جەمال موختار لە نووسینێکیدا ناوی لێناوە بە (کۆپی فلیمێکی کاوبۆی هۆڵیود ) کە چۆن دزەکان دوای بڕینی بانکێک، لەسەر دابەشکردنی پارە و دەستکەوت دەبێتە شەڕیان.

هەروەها ئەو گەنجانەی لالەزار کە ئەمڕۆ لە قەفەزدان و عەزیز ڕەئوف بەزەیی پێیاندا دێتەوە، ا پێناسەیەکی جوانی بۆ دەکات (دڵسۆزی پیاوێک بوون  دەسەڵاتی ڕەهای هەبووە)، بەشێکن لەو مەکینە سەرکوتکەرەی کە کاتی خۆی ئازادییەکانی لەو شارەدا خنکاندبوو.

بەداخەوە، وەک چۆن ئەیوب بارزانی دەڵێت ئێمە لەناو "سیستەمی دزە پیرۆزەکاندا" دەژین ، مێژووی کورد پڕە لە پیرۆزکردنی خائین و جەللادەکان. هەمیشە لە نێوان دوو بەرپرسی گەندەڵ و سەرکوتکەردا، هەوڵمان داوە یەکێکیان بکەین بە پاڵەوان.

ئەو نووسەر و ڕۆژنامەنووسانەی کە ئەمڕۆ کەوتوونەتە وەسفکردنی لاهور شێخ جەنگی وەک قوربانییەک یان پاڵەوانێکی بێتاوان، لە ڕاستیدا سووکایەتی بە عەقڵ و یادەوەری ئەو سەدان قوربانییە دەکەن کە لەسەردەمی دەسەڵاتی ئەودا لە زیندانەکانی دژە تیرۆر و زانیاریدا ڕووت دەکرانەوە، ئەشکەنجە دران و ماڵیان وێران دەکرا . گۆڕینی جلوبەرگی دەسەڵاتی خوێناوی بۆ (چاکەتێکی شینی شیک) لە دادگا ، مێژووی خوێناوی و سەرکوتکەرانەی هیچ کەسێک پاک ناکاتەوە. ئەوانەی ئەمڕۆ بە شان و باڵی  دەسەڵاتدارە تاوانبارەکانی دوێنێدا  هەڵدەدەن، رووی خۆیان رەش دەکەن و دەکەونە بەر نەفرەتی  مێژوو، جا نازانم ئایا ئەمانە روویان هەیە، تا پەڵەی رەشی مێژوو رووخساریان داپۆشێت.