- ئایا ژنانی کورد سەرنجی سەرکردەکانی جیهانیان لە پەرلەمانی ئەوروپا بۆ ئازایەتیەکەیان ڕاکێشاوە؟

- ئایا ئەو خاڵانە چین، کە تایبەتە بە ژنانی کورد، بەبەراورد بە ژنانی ناوچەکە؟

- ئایا ژنانی ڕۆژهەڵاتی ناوەڕاست دەتوانن چی لە ژنانی کورد فێربن؟

- ئەی ئاخۆ ژنانی ووڵاتانی ڕۆژئاوا، چی لە ژنانی کورد فێردەبن؟

- ئاخۆ چ تێکۆشانێکی ژنانی کورد، ئەوانی کردۆتە سیمبۆڵ بۆ ژنانی جیهانی؟

-----------

لە ٨ی ئازاردا، کە ڕۆژی جیهانی ژنانە، جیهان چاوی لەو ژنانەیە کە نەک هەر بەرگری لە مافەکانی خۆیان دەکەن بەڵکو خەبات بۆ ئازادی و دادپەروەری و کەرامەتی مرۆڤایەتیش دەکەن! لەو نێوەندەدا ژنانی کورد وەک سیمبولێکی بەهێزی بەرخۆدان و ڕزگاری وەستاوە و دەدرەوشێتەوە بەتایبەتی لە ناوچەکانی وەک ڕۆژاڤا و لە کۆڕ و کۆڕبەندە سیاسییەکانی وەک کۆنفرانسی ئاسایشی میونشن و پەرلەمانی ئەوروپا، کە سەرنجی سەرۆکەکانی جیهانیان بۆ خۆیان ڕاکێشاوە!

ژنانی کورد ڕۆڵێکی ناوازەیان بینیوە لە بەرگریکردن لە کۆمەڵگاکەیان لە بەرامبەر تیرۆر و فشاری ووڵاتە داگیرکەرەکانی کوردستان و چەوساندنەوەی نەتەوەیی و نایەکسانی ژنان بە گشتی لە ڕۆژهەڵاتی ناوەڕاستدا!

چونکە ژنانی کورد سەربەرزە و خۆیان لەماڵەوە و لەژێر حیجابدا نەشاردرابونەوە وەک لە فەلەستین و ووڵاتانی دەوروپشتدا دەبینرێت، بەڵکو لە هێڵی پێشەوەی شەڕی دەستەو یەخەدا بوون  وەک پێشمەرگە و سەرکردە و پارێزەری کۆمەڵگاکانیان. لە هەمان کاتدا ژنانی کورد بەشداریان لە پرۆسەی دیپلۆماسی و سیاسیشدا کردووە و دەکەن، بۆ نمونە ژنانی کورد بە بڕوا بەخۆبوون و لێهاتوییەوە لە کۆنفرانسە نێودەوڵەتییەکاندا دیدار و گفتوگۆکردن لەگەڵ سەرکردەکانی ئەوروپادا دەکەن بۆ چارەسەرکردنی کێشە نەتەوەیی و کۆمەڵایەتیەکان!

ئەوەی ژنی کورد تایبەت دەکات ئەوەیە کە خەباتی ئەوان تەنیا بۆ مافە نەتەوەییەکان نییە، بەڵکوو بۆ دادپەروەری کۆمەڵایەتی و خۆبەڕێوەبەریەتی و یەکسانی واتە ژن و پیاو هاوبەشن لە ماف و کار و سەرکردایەتیدا، وە ڕێکخراوەکانی ژنانیش لەم بارەدا ڕۆڵی یەکلاکەرەوە دەگێڕن، وە بواری پەروەردەش وەک کلیلێکی ڕزگاری ژنان سەیر دەکرێت، کە ژنان مافی خوێندیان لە کوردستاندا هەیە، وە هەروەها ژنانی کورد دەتوانێت ئەو سنور و وێنەیە بشکێنێت، کە کۆنەپەرستان لە ڕۆژهەڵاتی ناوەڕاستدا بۆ ژنانیان کردۆتە کۆت و زنجیر و کردویانەتە ملی ژنان، لەماڵەوە و لەدەرەوەش بونەتە قوربانی کۆمەڵگەیەکی داخراوی پیاوسالاری هەروەک چۆن دەبینرێت لە ئەفغانستان و ئێران و زۆربەی ووڵاتەکانی ئیسلامیەکاندا کە ژنان بە کەم عەقڵ و ڕۆڵیشیان تەنها بۆ چێژی سێکسی و بۆ جۆرەکانی نیکاح دەبینن!

ژنانی کورد نیشان دەدەن کە ئازادی ئافرەتان لە ڕێگەی کولتوور و کۆمەڵگا و هۆشیاری سیاسییەوە گەشە دەکات. ئەوان کەلتور و نەریت لەگەڵ ژیانی مۆدێرندا تێکەڵ دەکەن و  بەرەنگاری ئەو پێکهاتە پیاوسالارانە دەبنەوە کە ڕۆڵی ژنانیان سنووردار کردووە!

ژنانی کورد ئەوە پیشان دەدەن کە پێشکەوتنی ڕاستەقینە لە پەروەردە و خۆڕێکخستن و بەشداریکردن لە بڕیاردانەوە دەست پێدەکات.

ئەوان دەیسەلمێنن کە ژنان نابێت ڕۆڵی لاوەکی بۆ پشتیوانی لە کۆمەڵگادا بگێڕن، بەڵکو دەبێت ژنان هاوبەش و هاودروستکەری ئازادی و ئاشتی و سەقامگیری بن

ژنانی کورد وا لە ژنانی کۆمەڵگا ڕۆژئاواییەکان دەکەن، کە دەبێت چاوکراوە بن و ئەوە چاک بزانن کە هەرگیز ئازادیەی کە ئەوان ئێستا هەیانە، لە خۆیەوە نەهاتووە، بەڵکو هەزاران کەس لە مێژووی ئەو ووڵاتانەدا خۆیاندا، بونەتە قوربانی و خوێنیان بۆ ڕشتووە، بۆیە پێویستە ژنانی ئێستای ڕۆژئاوا، ڕێزی لەو ئازادی و دیموکراتیە بگرن! وە ئەوەش بەئازایەتی و هاودەنگی و هاوکاری و بەرپرسیارێتی هەموان دەبێت کە دیموکراسی و یەکسانی پێویستی بە پابەندبوونی بەردەوام هەیە.

خەباتی ژنانی کورد لە سنوورە نەتەوەییەکانی خۆیان تێپەڕیوە. چونکە ئەوان بەرگری لەو بەهایانە دەکەن کە لە سەرانسەری جیهاندا ناسراون، ئەویش کەرامەتی مرۆڤ و یەکسانی لەبەردەم یاسا و مافی خوێندن و سەربەخۆیی ئابووری و ئازادی و ڕاپەڕین دژی ستەم!

لەم ڕۆژە جیهانییەدا، ژنانی کورد شایەنی دانپێدانانن وەک پێشەنگی گۆڕانکاریە کۆمەڵایەتیەکان لە جیهاندا بە گشتی و لە ڕۆژهەڵاتی ناوەڕاستیشدا بەتایبەتی!

دەنگی ژنانی کورد تەنیا دەنگی نەتەوەیەکی بێ دەوڵەت نییە، بەڵکو دەنگی ملیۆنان ژنە کە بۆ جیهانێکی دادپەروەر و ئازادی تێدەکۆشن!

بە بۆچونی من، کاتێک کە ژن ئازاد بێت، ئەوا کۆمەڵگاش ئازاد دەبێت! چونکە هەموان لە سکی ژناندا دروست دەبین و لەباوەشی ژنانیشدا پەروەردە دەبین!