ئێستاش ئەوسایە

ئەو ئێستاش كە دەنگی فڕۆكە ئەبیستێ ،

لەجێدا دڵی خورپە دایدەگرێت و

پڕ دەداتە منداڵێكی سێ چوار ساڵە !

ئەو ئێستاش كە باڵای پۆلیسێ ئەبینێ ،

خەریكە زەندەقی بچێت و

چەند دەرگا لەسەرخۆی دائەخاو

دەخزێتە كونجوڕی ئەو ماڵە !

ئەو ئێستاش كە بۆنی میوەیەك

ـ بۆ وێنە كە بۆنی سێوێ دێ ـ

بە دەستێ بەتانی تەڕ ئەكاو

بەدەستێ منداڵێ هەڵئەگرێ و

نازانێ بەرەو كوێ ڕائەكا ؟!

ئەو ئێستاش خواردنی سێ ژەمەی هەرچی بێت

هەر تامی ڕەقەڵە سەمونی زیندانی ئەوسایە .

ئەو ئێستاش هەروایە ......

لەلای ئەو فڕۆكە هەر تەنیا

زمانی بۆردومان ئەزانێ و

پۆلیسیش پاڵەوانی لێدان و كوشتنە و

ئەو ئێستاش یەقینی وەهایە ؛

كەمیوە شوناسی یەكجاری كیمیایە !

ئەو ئێستاش بەغەیری زیندانی كولبەكەی ،

بەغەیری رەقەڵە كولێرەی سێ ژەمەی

نابینێ شوێنێ دی ،

نابینێ ژەمێ دی

لەسەر تا خواری ئەم دنیایە