پێشنیارێك بۆ بەڕێزان: سەرۆكی حكومەتی هەرێم و هەموو وەزیر و جێگری وەزیرە بەڕێزەكانی حكومەتی هەرێمی كوردستان؛

لەو ڕوانگەیەوە كە هەموومان لە بەلەمێكداین لە ئۆقیانوسی هەڵچووی جیهانی ئەمڕۆدا، ڕێگە بەخۆم دەدەم پێشنیارێك بخەمە بەردەستی بەڕێزتان، كە ڕاستەوخۆ پەیوەندی بە ژیانی خەڵك لە كوردستان و بە پێشكەوتنی نەتەوەكەمانەوە هەیە.

ئەویش بریتیە لە:

"لابردنی دەزگای تەلەفزیۆن و سەتەلایت لە هەموو دام و دەزگاكانی دەوڵەتدا"

ئەم پێشنیارە دژی هیچ كام لە دەزگاكانی ڕاگەیاندن و كەناڵە تەلەفزیۆنی و ئاسمانیەكان نیە، هەموو كەس ئازادە لە ماڵی خۆیدا سەیریان بكات بەڵام تكا دەكەم با ئەو دیاردەیە لە دام و دەزگای دەوڵەتدا نەمێنێت.

بۆچی؟
１- پاشەكەوت كردنی ووزەی كارەبا
بە داخەوە من هیچ ئامارێكم لەلا نیە كە چەند تەلەفزیۆن یان سەتەلایت لە ژوورەكانی دام و دەزگای دەوڵەت و دائیرەكاندا هەیە، هەر لە نوسینگەی بەڕێزانتانەوە بگرە هەتا بەڕێوەبەرەكان و كارمەندان و بگرە پاسەوانەكانیش.
ئەو ژمارەیە لەوانەیە بەشێوەیەكی تۆقێنەر گەورە بێت، با بێین زەربی تێكڕای سەرف كردنی هەر دەزگایەكی بكەین!
ئایا لابردنی ئەو دەزگایانە، بەشێكی كێشەی كارەبا چارەسەر ناكات؟

２- خاڵی دووەم و زۆر هەستیار، ڕاستەوخۆ پەیوەندی بە ئاڕاستەكردنی بیركردنەوەی نەتەوەكەمانەوە هەیە.
بەڕای من دەزگای تەلەفزیۆن ئەمڕۆ لەجیهاندا دەزگایەكی مەترسیدارە،
تاكە دەزگایە كەبەبێ لەدەرگادان دەچێتە هەموو ماڵێكەوە، چ جای بچێتە هەموو دام و دەزگاكانی دەوڵەتیشەوە.
ڕێژەیەكی زۆری پرۆگرامەكانی تەلەفزیۆن، لە ئەمریكا لەدایك دەبن، پاش چەند مانگێك دێنە ئەوروپاش ئنجا چەند مانگێك دوای ئەوێ دێنە توركیا و پاشان كوردستان و ووڵاتانی دەوروبەر، بە كۆپی كراوی وە زنجیرەكانیش بە دۆبلاژكراوی وەك مادەی بێهۆشكەر خەڵك بێ ئاگا دەكەن.
بێ ئەوەی هیچ لایەن و دەزگایەك لێكۆڵینەوەیان لەسەر بكەن.
مەترسی لەوەدایە لەم دوا دواییەدا تەلەفزیۆن بوە بەشێك لە میدیای ئاڕاستەكراو بە جۆرێك كاریگەری تەواوی لەسەر گۆڕینی بیر و بۆچوونی بینەران زیادكردوە، جگە لە گۆڕینی پێكهاتەی نەوەكان، گۆڕینی ڕەوتی مۆسیقا و كولتووری ڕەسەن، گۆڕینی زمان و زاراوەكانی، گۆڕینی پەیوەندیە كۆمەڵایەتی و خێزانیەكان، چەواشەكردنی ڕاستی و مەسەلەی ڕەوای نەتەوەكەمان هەروەها گۆڕینی ڕاستیە مێژوویەكان و چەندین لایەنی تر.

جگە لەمانە لە دام و دەزگای دەوڵەتدا نیشاندانی هەر كەناڵێك ناوخۆیی بێت یان دەرەكی دەبێتە ڕیكلام كردن بۆ ئەو كەناڵە.

دیارە لەو شوێنانەدا كە هاووڵاتی ماوەیەكی درێژ ناچارە دابنیشێت و چاوەڕوانی ئەنجامدانی كارەكەی بێت، زۆر ئاسایی و مۆدێرنە ڕۆژنامە و گۆڤار دابنرێت.
ئەگینا كارمەند كار دەكات نەك سەیری تەلەفزیۆن! خۆئەگەر كاتێكی كەمیش دەستی بەتاڵ بوو با بفەرموێت ڕۆژنامە، گۆڤار یان كتێب بخوێنێتەوە و پەرە بە تواناكانی خۆی بدات.

زۆر لەجێی خۆیشیدایە ئەو ژمارە زۆرەی تەلەفزیۆن و سەتەلایتانە بفرۆشرێن لە بازاڕی ناوخۆ یان ووڵاتانی دراوسێ دا و بە پارەكەی موەلیدە بۆ ئەو گەڕەك و لادێیانە دابین بكرێت كە زۆر پێویستیان پێیەتی زیاتر لەوكەسانەی لە جێیەكی ڕووناك و گەرم لە زستان و فێنك لە هاویندا دانیشتوون و لەگەڵ كاركردن سەیری تەلەفزیۆن دەكەن.

زۆر سوپاساتان دەكەم وهیوادارم پێشنیارەكەم بەهەند وەربگرن.



ئەندازیار
تایەر عەلی ڕەسوڵ
www.taher.org