دیلکوژیی و یەکێتی نوێ و شەرمەزاریی لالەزار!

15/11/2025, 0:02 (GMT+1)

دوو مانگ و دە ڕۆژێ لەمەوبەر، قەتڵوعامی سەر ئوتێل لالەزار ڕوویدا و ناوچاوی بەخوێن سووربووی یەکێتی، ئەوەندەی دیکە سوورتر کرد!

هێنانی دەبابە و دۆشکە و هێرشی درۆنیی، ڕووی ڕەشی ئازادییە درۆینەکەی دەڤەری سلەیمانی،

بۆ هەمووان ئاشکرا کرد.

پاش ئەو ماوەیە و دیارنەبوونی چارەنووسی هەندێک لە گیراوان و پارێزەرانی ئامۆزاکانی کوڕەکانی تاڵەبانی، دوێنێ لە ڕێگەی پشکنینی دی ئێن ئەیەوە تەرمی یەکێک لە قوربانییەکان گەڕێنرایەوە ناوچەی باڵەکایەتی.

بۆچی ئەم ڕووداوە خوێی کرد بەسەر برینەکاندا و ئەوەندەی دی بەسوێی کردن؟

وەکی دەگێڕنەوە و بە پێی یەکێک لەو وێنانە بێ کە دوای ئابڕووچوونەکە بڵاوکرانەوە، هەندێ لە دەستگیرکراوان بە برینداریی کوژراون یان دوای بەندکردنیان، بە سزادان و ئەشکەنجە لەناوبراون!

ئەو گەنجە کوژراوەی باڵەکایەتی، ئەوەندەی دیکە کارەساتەکەی جەرگبڕتر کرد.

ئاخر کوا ئازادی و هەڵبژاردنی ڕێچکەی سیاسەتکردنی جودا!

ئەوەبوو بەرهەمی یەکێتی نوێ و دەسودیارییەکەی بۆ دەڤەری پەراوێزخراوی سلێمانی!

لە کوێی دنیادا هەبووە دیل بەو شێوە دڕندانەیە لەناوببرێ؟

سەرانی حیزبە ڕووزەردەکەی دوای لالەزار، چۆن ڕوویان دێ بانگەشەی هەڵبژاردن بکەن و چلۆن پاکانەی ئەو تاوانە قێزەونە بکەن!

بەرانەکینێ وەکی وتراگە:

تفیان ئەکردە ناوچاو بێعارێ

ئەیوت: هیچ نییە، باران ئەبارێ

ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا نووسەرەکەی بەرپرسیارە، نەک کوردستانپۆست