پەخشی ڕێشۆ: بەشەوچەرەکردنی تراجیدیای میللەتێک
پێش 2h

- پەیامی دەستی پشت پەخشی ڕێشۆ:
لەبەر گرانی سووتەمەنی؛ لەماڵەکانتاندا تەنها زۆپایەک ئیش پێ بکەن و تەنها هۆڵەکەی پێ گەرم بکەن و لەدەوری زۆپاکە کۆببنەوە و بەدەم چا خواردنەوە و گوڵەبەڕۆژە خواردنەوە دانیشن بەدیار ڕێشان شۆوە، وە زەردەخەنە بخەنە سەر لێوەکانتان و پێبکەنن بە حاڵی شڕتان و دۆخەکە ئاسان وەرگرن وە لە کۆتایشدا بیرتان نەچێت: (سوپاسی خۆڕاگریتان دەکەین).
- لە پێکەنین بە دۆخی شڕی مووچەخۆرەوە بۆ بچووک کردنەوەی تاوانی دزی نەوت بۆ نوکتەی شەوچەرە و گوڵەبەڕۆژە تەقاندن.
- بچووک کردنەوەی قەیرانە کوشندە و ماڵوێرانکەرەکان بە بەکارهێنانی پەخشی تەنزی سیاسی وەک ئیسفنجێک بۆ هەڵمژینی توڕەیی خەڵک.
- ساردکردنەوە و ئەهوەنکردنی توڕەیی خەڵک،بە تەنزێکی ساختەی سیناریۆ بۆداڕێژراو.
ئەمەیە تراجیدیای تەنزی دەستکردی دەسەڵات، کە تیایدا لەبری دەسەڵات میللەت قەشمەڕ ئەکرێت!
ئەمەیە کەم کردنەوە و بێڕێزی بە تەنزی سیاسی ڕاستەقینە، کە تیایدا دەسەڵات پێش هەموو کەسێک تەنزی ساختە لەسەر خۆی دەکات تا تەنزی سیاسی ڕاستەقینە بکاتە قسەی سواو و بێ بایەخ!
ئەمەیە بێڕێزی بە شعوری خەڵک، کە دەسەڵات بەوپەڕی ڕوو قایمییەوە بە نمایشێکی گەوجێنەر هەوڵدەدات خەڵک بخاتە پێکەنین بە دۆخی شڕ و نالەباری خۆی!، ڕێک وەک پێگەیشتووێک کاتێک دەبێتە هۆکارێک تا مناڵێک بە خراپی بەربێتەوە سەر زەوی،هەر بۆیە هەوڵ دەدات منداڵەکە بخاتە پێکەنین و ڕووداوەکە بە تەنز وەر بگرێت و ئازارەکەی بیر بباتەوە و ڕێگری لە گریانی منداڵەکە بکات تا خۆی دەرباز بکات لە هەڵەکەی.
- من وەک نووسەرێکی ئاسایی بواری تەنز پێم وایە: نووسەر کاتێک بابەتێکی تراجیدی دەگۆڕێت بۆ تەنز نابێت گەورەیی و نرخی تراجیدیاکە بزر بکات،بەڵکوو ئامانجی سەرەکی لە گۆڕینی تراجیدیا بۆ تەنز:درووست کردنی کاریگەرییە لەسەر بازنەیەکی فراوانتری کۆمەڵگا، وە لە هەمان کاتدا سوککردنی تێگەیشتنی بابەتە تراجیدییەکەیە،نەک سوککردنی خودی بابەتە تراجیدییەکە!
کەواتە پێویستە بابەتی تراجیدی لە ناو تەنزدا لە فلتەر بدرێت و تیایدا ئەو ڕەهەندانەی کە لە بابەتە تراجیدیاکەدا دەبنە هۆی درووست کردنی خەم یان هەستی خوێنەر و بینەر دەجوڵێنن لا ببرێن، بەمەش دەتوانرێت هەمان پەیام کە پێشتر تراجیدیبوو بە شێوازێکی تەنز ئامێز بگەیەندرێت تا مرۆڤە هەست ناسکەکانی وەک (بەساڵاچوو و گەنج و ئافرەتان) بتوانن بەبێ کاریگەری نەرێنی لەم پەیامە تێبگەن.
وە پەیامی تەنز ئامێز پێگەیشتووترین وەشانی پەیامە،چوونکە نووسەر کاتێک دەتوانێت بەرگی تەنز بکات بەسەر پەیامێکدا کە لەوپەڕی تێگەیشتنیدابێت لەو پرسەی کە پەیامە تەنزییەکەی هەیە لەسەری، بەڵام وەک ووتمان تەنزێک تیایدا ئەو کۆسپ و تاسە و قۆرتانەی کە کاریگەری لەسەر مرۆڤە سۆزدارەکان درووست دەکەن کەم بکرێنەوە نەک خودی پەیامەکە کەم بکرێتەوە بۆ شەوچەرەیەکی کاتی چاخواردنەوە و کۆبوونەوەی خێزان لەدەوری زۆپا.
تەنز دەبێت بێلایەنبێت، دەبێت سەربەخۆبێت.
تەنزی سیاسی دەبێت ئەنجامەکەی بە ڕسواکردنی کردەوەیەکی قێزەونی دەسەڵات کۆتاییبێت، نەک بە ساردکردنەوە و بێهیوا کردنی خەڵک!
- بۆیە لە شیکاری پەخشی ڕێشۆدا بۆ بابەتەکان: سەرەتای هاوکێشەکان ڕاستن
وەک هاوکێشەی:دزی نەوت، بێ مووچەیی، دوو ئیدارەیی، واستەی دامەزراندن....
بەڵام دواتر کە شیکاری دەکرێن وەڵامەکانیان هەڵەن!، چوونکە میللەت ئەبێت لە ئەنجامدا بە خۆی پێ بکەنێت!
واتە لە کۆتایی شیکارییەکەدا لەبری ڕسوابوونی لایەنی پەیوەندیدار، خەڵک بەچەوساوەیی و ستەملێکراوی خۆیان پێدەکەنن!
دەتوانین بڵێین پەخشی ڕێشۆ تەنزێکی سیاسییە بەڵام سیاسەت بە خەڵکی دەکات!(هێرشی پێچەوانە).
ئەوەیە ڕوو قایمی سیاسی کوردی: دەبێت خەڵک بە حاڵی شڕی خۆی پێ بکەنێت!
کاتێک خۆت دەسەڵاتی و لەکەناڵی خۆشتەوە دێیت تەنزی سیاسی لەسەر خۆت دەکەیت،ئیتر ئەمە دەبێتە سیناریۆ، دەبێتە نمایشێکی گەوجێنەر،نەک تەنزی سیاسی.
- کەواتە پەخشی ڕێشۆ چییە؟
بەتاڵ کردنەوە و گۆڕینی ناڕەزایەتییە بۆ کات بەسەربردن و بێهیواکردنی خەڵکە لە گۆڕانکاری...
وە لە کۆتاییا دەبێتە بەنج کردنێک بۆ خەڵک، بەڵام هەرگیز نەشتەرگەریش ناکرێت،بەڵکوو
بە هەمان دەردەوە بە بەنجکراوی دەیهێڵنەوە!
ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا نووسەرەکەی بەرپرسیارە، نەک کوردستانپۆست







