<

ماوەتان بەسەرچووە،بۆ ناڕۆن بڕۆن! مردوو زیندوو نابێتەوە

پێش 1h
ماوەتان بەسەرچووە،بۆ ناڕۆن  بڕۆن! مردوو زیندوو نابێتەوەنووسەری دیکەماوەتان بەسەرچووە،بۆ ناڕۆن بڕۆن! مردوو زیندوو نابێتەوە



عمر شاوری

پەرلەمان و حکومەتی کاربەڕێکەر، چیتر شەرعییەتیان نییە
ئەمڕۆ قسەی ڕوون و ڕاست لە هەموو کەسێک داواکراوە. کاتی مجامەلە و بێدەنگی و چاوپۆشین تەواو بووە. کاتی ئەوە هاتووە ناوی شتەکان بە ناوی خۆیانەوە ببەین. 
هەرێمی کوردستان ئەمڕۆ لە خراپترین دۆخیدایە لە دوای ١٩٩١ـەوە ئەگەر ئەمڕۆ  بەچاوێکی ڕەخنەگرانە سەیری  ڕەوشەکە بکەین دەبینین . مووچە لەکاتی خۆیدا نییە، کارەبا نییە، ئاو نییە، خزمەتگوزاری نییە، متمانە نییە، هیواش نییە. ئاسودیش نییە    خەڵک لە بازاڕدا بەدوای ناندا دەگەڕێت، خەریکی پەیدا کردنی بژێوی ژیانی خانەوادەکەیەتی  بەڵام  دەبینین کاربەدەستان لە کۆشکەکانیاندا بەدوای کڕینی دەنگی ئەندام پەرلەماندا دەگەڕێن. بدوای نێچیری لاوازدا دەگەرێن بەدوای خەڵکی انتیهازی و ویژدان فڕۆشدا دەگەڕێن  کرین و فڕۆشتن  لەبازاری   دژبەیەکدا 
پەرلەمانی ئێستا، پەرلەمانێکی مردووە. نە یاسا بۆ خەڵک دەردەکات، نە چاودێری حکومەت دەکات، نە دەنگی خەڵک دەگەیەنێت. پەرلەمانەکەتان کردووەتەوە بە مەیدانی ململانێی کەسی و حیزبی، نەک مەیدانی بڕیاری نیشتمانی. مردوو زیندوو نابێتەوە، و ئەم پەرلەمانەش ناتوانێت ببێتەوە بە دەنگی گەل.
حکومەتەکەی مەسرور بارزانی و قوباد تاڵەبانی، حکومەتێکی کاربەڕێکەری ماوەبەسەرچووە. نەک حکومەتی خزمەت، بەڵکو حکومەتی بەڕێوەبردنی قەیرانەکانە بە قەیرانی گەورەتر. هۆکارەکەشی ڕوونە: لووتبەرزی، حساب نەکردن بۆ خەڵک، و نەبوونی پیاوی دەوڵەتداری.
لە کاتێکدا بەغدا بە یەک دەنگ بڕیار لەسەر مووچە و بودجە و چارەنووسی کورد دەدات، لە کاتێکدا تورکیا و ئێران و ئەمریکا لەسەر نەخشەی نوێی ناوچەکە مامەڵە دەکەن، ئێمە لە هەرێمدا دوو ئیدارەمان هەیە، دوو بڕیارمان هەیە، دوو دەسەڵاتمان هەیە، بەڵام یەک چارەسەرمان نییە، یەک بڕیارمان نییە، یەک دەنگمان نییە.
هەولێر و سلێمانی لە یەکتری دوور دەکەونەوە، و دوژمنانی کورد لەم دووبەرەکییە کەڵک وەردەگرن. بەغدا ئەم لاوازییە دەبینێت و فشارمان لەسەر زیاد دەکات. ئەنقەرە و تارانیش بە هەمان شێوە.
بەڵام داخی گرانم ئەوەیە: ئەوەتا کەرکووک بە دەنگی خیانەت جارێکی تر لەدەست دەدەنەوە. دەنگ نادەن بە کوردێک، تەنیا لەبەر ئەوەی کەرکووک نەکەوێتە دەست کوردێکەوە، دەنگ دەدەن بە تورکمانێکی سەر بە تورکیا. ئەم عەقڵییەتە وەک نەخۆشییەکی سەرەتان کوشندەیە. ئەگەر بەزوویی چارە نەکرێت، هەموو کوردستان لەناو دەبات. کەرکووک تاقیکردنەوەی نیشتمانپەروەری بوو، و ئێوە لەو تاقیکردنەوەدا دەرنەچوون.
بۆیە کاتی ئەوە هاتووە هەموو خەڵکی هەرێمی کوردستان، بە هەموو ڕەنگە جیاوازەکانیانەوە، کورد و عەرەب و تورکمان و کلدان و ئاشووری و ئێزیدی، بە یەک دەنگ بڵێن:
سەرۆک وەزیران و جێگرەکەی و کاربەدەستانی حکومەتی ماوەبەسەرچوو، دەست لەکار بکێشنەوە. ئێوە شیاوی حوکمڕانیکردنی ئێمە نین و هیچ شەرعییەتێکتان نەماوە. با ئێمە نیشتمانەکەمان بنیاد بنێینەوە، ئێوەش بڕۆن و بحەسێنەوە.
ئێمە ناتانکوژین، بەڕێزەوە داواتان لێدەکەین دوور بکەونەوە لە حکومەت، چونکە ئێوە پیاوی دەوڵەتداری نین. دەوڵەتداری بەرپرسیارێتییە، نەک دەسەڵاتداری.
وە هەرکەسێک دواتان بکەوێت و بەرگری لەم دۆخە بکات، با تا هەتا هەتایە بێدەنگ بێت و چیتر باسی نیشتمانپەروەریمان بۆ نەکات. نیشتمانپەروەری بە درۆ و بەڵێنی بەتاڵ نابێت، بە نان و مووچە و پاراستنی کەرامەتی خەڵک و خزمەتگوزاری و شەفافییەت دەبێت.
بۆ هەموو خەڵک دەرکەوت، ئێوە دژی ئازادین، دژی دەوڵەتداری، دژی یاسا، دژی جیاکردنەوەی دەسەڵاتەکان، دژی پێشکەوتنی وڵات، دژی عەقڵانییەت، دژی  ڕۆژنامەنوسان  ، دژی ئەو گەشەیەی سەروەری دروست دەکات، دژی شادی، دژی کارکردن لەپێناو بەختەوەری هاوڵاتییان، دژی حزبەکان، دژی کۆمەڵەکان، دژی سەندیکاکان، دژی گۆڕانکاری، دژی ئەوەی خۆتان چاک بکەنەوە، دژی ئەوەی گوێ لە ئامۆژگاری بگرن، دژی ئەوەی دەست لەکار بکێشنەوە، دژی ئەوەی شەفافییەت هەبێت!
دژی ئەوانەن کە بە دەنگێکی بەرز داوای ڕۆیشتنتان دەکەن. دڵنیابن ئێوەی خۆسەپێن، بۆ بەرژەوەندی خۆتان و بەرژەوەندی وڵاتەکە دەڕۆن. چونکە گەل لە دەسەڵاتی ئێوە گەورەترە، و مێژوو چاوەڕوانی کەس ناکات.
ڕێنمایی گەل بەهەند وەربگرن، پێش ئەوەی گەل بڕیارەکەی خۆی بە شێوەیەکی تر بدات.
ئەو بابەت و هەواڵانەی کە ناوی نووسەرەکانیان دیار و ئاشکرایە، تەنیا نووسەرەکەی بەرپرسیارە، نەک کوردستانپۆست