هێرۆ خیرواللە تولفاح / ئوتومبیلى وەنەوشەى كردۆتە مەمكەمژە بۆ ژیركردنەوەى مەسئولە تۆراوەكان

لەوڵاتێكدا كە بودجە و سامانى گشتى یەك میللەتى بێ خزمەتگوزارى و رەش و رووت و برسى چۆتە گیرفانى هەندێ بەرپرسەوە و وەك میراتى ماڵەباب رەفتارى لەتەك دەكەن ، لەوڵاتێكدا كە كچەكەى بلەى ئەحە رەش وائەزانێ كۆمەڵانى خەڵكى سواڵكەرى بەرقاپى ماڵى باوكین ، لە مەملەكەتێكدا كە سەرراوەشاندنى هیرۆى خڵەفاو بەسە بۆئەوەى بەئەندازەى موچەى چل ساڵى فەرمانبەرێك بكرێتە پاداشت و بۆ كاسەلێسەكانى سەرف بكرێت ، لەمجۆرە وڵاتانەدا ئەوەى ناوى شەفافیەت بێت بوونى نیە و هەموو بریارەگرنگەكان لەودیو پەردەى رەش و شوێنە تاریكەكاندا ئەنجامدەدرێت ، هیرۆ و باندەكەى كە ئەمڕۆ بوون بە زوحاكى خوێنمژى خەڵكى بێدەسەڵات .. تاكو بۆیان كرا لەشەڕى دەسەڵات و كورسى حوكمدا بەدەیان هەزار كوڕى گەنج و جوانى ئەم میللەتەیان بەكوشت دا و كەم ئەندامیانكردن یان بێسەروشوێنبوون ، ئەو شەڕەى لەسەر دۆلارە سەوزەكانى گومرگى ئیبراهیم خەلیل و سنوورى دەسەڵاتى حیزبى بوو .. ئەو شەڕەى كوڕى هیرۆ و مەسئولەكان لەهەموو پریشكێكى بەدووربوون ، ئەو شەڕەى تاكو ماوە پەڵەى عار و شوورەیى یە بەنێوچەوانى هیرۆ و جەلال و مەسعودەوە ، بەڵێ پێشتر كە داهاتى دۆلار كەم بوو بەگوللە و ئاگر و ئاسن یەكێتى و پارتى مامەڵەیان لەتەك یەكتر دەكرد ئیستا كە دۆلارى بودجەى گشتى هەڵڕژاوە و چەمى هەموویانى چەور كردووە لەبرى گوللە پەیمانى ستراتیژى پاراستنى بەرژەوەندى بنەماڵە ئەیانبەستێت بەیەكترییەوە ، بەڵام ئامادەن پێكەوە بەگوللە و ئاسن هەموو دەنگێك كپبكەن كە ناپیرۆزى خیانەت و سیخوڕى و جەردەییان بۆ خەڵكى هەڵبماڵێ وەك ئەوەى لەگەڵ سۆرانى مامە حەمە و زەردەشت عوسمان و دەیانى تر ئەنجامیاندا و ئەنجامى دەدەن .

پاش كۆنگرە فاشیل و سەرنەكوتووەكەى سێى ى.ن.ك ئەو كۆنگرەیەیى كە هیرۆخان ناوى كاندیدەكانى لە دەزگاى زانیارى چاپكرد و بە دكتۆر خەسرەوى وت تەنها ئەمانە پێویستە سەربكەون ، لەو كۆنگرەیەدا كەپێش چوار هەفتە لە ئەنجامدانى هەموو كەسێك ئەیزانى كێ دەرئەچێ و كێ تڕۆ ئەبێ ، پاش ئەم شانۆگەرییە زۆر كادرى كۆن كەبەتەماى دەرچوون بوون بۆ سەركردایەتى و دەرنەچوون و كرانە قوربانى لیستە چاپكراوەكەى هیرۆ خیرواللە تولفاح ، زۆر لەم كادرانە چونە ماڵەوە و چەند هەفتەیەك بە عاجزى خۆیان كەنارگیركرد بەڵام پاشتر هیرۆخان هەریەكەو ئوتومبیلێكى وەنەوشەى دوا مۆدیلى بۆكڕین و وەك مەمكەمژە كردى بەدەمیانەوە و ئیتر ئەوانیش خواهەڵناگرێ گڕۆزیان نەما و لەمەلۆتكە نوێكەیاندا كپبونەوە ، ئەو سەدان ملیۆن دینارەى لەم تەخشان و پەخشانەدا هیرۆخانى شاژن بەهەدەرى دا بودجەى گشتى میللەت بوو و میراتى بلەى ئەحە رەش نەبوو ، ئەو بەرپرسانەشى ئەم بەرتیلەیان لەهیرۆ وەرگرت مۆركى خیانەتیان نا بەنێوچەوانیانەوە .

ئەوەى من لێرەدا مەبەستمە ئەوەیە میللەت با زۆر باش ئەو راستیە بزانێت كە ئەو حكومەت و دەسەڵاتەى ئایندەى خۆیان و ماڵومنداڵیان خستۆتە ئاسۆیەوە ئەم حكومەت و دەسەڵاتە گەندەڵەیە كە هیرۆى ساجیدە ئاسا ئوتومبیلى وەنەوشەى تیا كردووە بە مەمكەمژە و مەسئولە نامەسئولە تۆراوەكانى پێ ژیردەكاتەوە ، بۆیە داواى من لێیان ئەوەیە كە ئەم هەڵوێستە خیانەتكارە و هەڵوێستى ئەندام پەرلەمەنەكانى گۆران لەبیرنەكەن كە چل و هەش ملیۆن دیناریان رەتكردووە كە بۆ كرینى ئوتومبیل بۆیان دابینكرابوو تــــــــــــــــــاكو لەكاتى هەڵبژاردنى رابردوودا لووتى هیرۆى خائین و كاسەلێسەكانى لەنێوقوڕپێ بنێن .