تاڵەبانی: با كاكە نەوە خۆى هەڵنەبژێرێت، من خۆم شەش كورسى ئه‌دەمێ

ماوەى چوار رۆژە سەرۆك عەشیرەتەكانى (جاف) لە هەوڵى ئەوەدان، كە كێشەى یەكێتى چارەسەر بكەن. بۆ ئەو مەبەستە سەردانى هەر یەك لە نەوشیروان مستەفا و كۆسرەت رەسوڵیان كردووە و هەردووكیان رایان وابووە، كە تاڵەبانى دەست لە كاربكێشیتەوە ئەوجا كێشەى یەكێتى چارەسەر دەكرێت، ئەم پەیامەى نەوشیروان و كۆسرەت دەگەیەننە تاڵەبانى، تاڵەبانیش بەزۆر باوەڕبوون بەخۆیەوە بە عەشرەتى جافەكان دەڵێت: منیش ئەم پەیام و راسپاردانەم هەیە.
1- من شەست ساڵە خەبات دەكەم بەریشى كێ رەوایە دەست لەكاربكێشمەوە و بەجێى بهێڵم بۆ خەڵكى تر.
2 بە من دەڵێن ماڵى میللەتى دزیوە؟ من لە هەموو كوردستاندا دوو دۆنم ئەرزم هەیە ئەویش لە میراتى دایكم بەرم كەوتووە.
3- نەوشیروان مستەفا لەگەڵ من كێشەى نییە لەگەڵ بەرهەم ساڵحدا كێشەى هەیە.
4 - بە كاكە نەوە بڵێن، باخۆى هەڵنەبژێرێت ولیستى نەبێت ئەو رێكەوتنە گرنگەى پارتى و یەكێتى هەڵنەوەشێنێتەوە. ئەگەر خۆى هەڵبژێرێ ئەو پەرى (سێ كورسى) ئەهێنێ بەس باسى لیستى جیاو هەڵبژاردن نەكات خوم (شەش) كورسى دەدەمێ.
5 - گوناهى من چییە (دوانزە رۆژە) نامەم بۆ كاكە نەوە ناردووە، كە پێكەوە دانیشین، بەڵام لە گەڵم دانانیشێ؟
دواتر وەفدەكە چونەتەوە لاى كۆسرەت و پێیان ووتوە تاڵەبانى دەڵێت نەوشیروان كێشەى لەگەڵ مندا نییە كێشەى لەگەڵ بەرهەم و ئەوانى تردا هەیە. كۆسرەتیش ووتویەتى مام جەلال راست ناكات خۆى سەرچاوەى هەموو كێشەكانە و دەیەوێت یەكێتى هەڵبوەشێنێتەوە. دواتر وەفدەكە دەچنە لاى نەوشیروانیش پێى دەڵێن: لە بەرخاترى ئێمە لەگەڵیادا دابنیشە ئەویش وتویەتى دادەنیشم لەگەڵیا، بەڵام من ناچم بۆ لاى ئەبێت ئه‌و خۆى بێت.