گەندەڵى و بێ یاسایى لە وەزارەتى پەروەردە تا سەر ئێسقانە!

ماوەیەك لەمەو پێش لە لایەن دەوڵەتى (توركیا) وە داوەت نامەیەك بۆ وەزارەتى پەروەردەى حكومەتى هەرێمى كوردستان ڕەوانەكرا كە تێیدا داواى چەند مامۆستایەك لە پسپۆڕانى (كیمیا و فیزیا و زیندەوەرزانى) كردبوو كە سەردانێكیان بۆ ڕێك دەخەن بۆ توركیا تاكو ئاستى زانستى و ڕۆشنبیریان لە بوارى تاقیگە (المختبر) بەرز بكرێتەوە و شارەزایى پڕاكتیكى (عملی) بە هێز بكرێت ، خولى تاقیگەى توركیا ببینن كە گەڕانەوە كوردستان بتوانن سەركەوتوانە لە تاقیگەكانى قوتابخانە تاقیكردنەوەكانیان جێ بەجێ بكەن و قوتابیانى كوردستان سوودیان لێوەربگرن.

هەتا ئێرە زۆر ئاساییە بەڵام ئەوەى جێگاى سەر سووڕمان و جێگاى پرسیارە كە چەند بەڕێوەبەرێكى وەزارەتى پەروەردەى حكومەتى هەرێمى كوردستان ناوى چەند مامۆستایەكیان سڕیوەتەوە ناوى خۆیان خستۆتە جێگاى ئەو مامۆستایانە و ئەم بەڕێوەبەرە چەلەنگ و

(سۆپەر پەڕێوەبەرانە) سەردانى توركیایان كرد كە بە هیچ شێوەیەك پەیوەندیان نە بە تاقیگە و نە بە قوتابخانەوە نى یە چونكە پسپۆڕى ئەوان نیە.

ئایا وەزیرى بەڕێزى پەروەردەى كوردستان چۆن ڕازى بوو؟؟ یان ئەویش ئاگاى لە ناوخۆى وەزارەتەكەى نى یە چى ڕوودەدات و چى دەگوزەرێت؟ یان دەسەڵاتى ئەو فس فس پاڵەوانانەى نى یە نەوەكو نهێنیەكان و شتە شەخسى و تایبەتیەكانى جەنابى وەزیر ئاشكرا بكەن!

ناوى ئەو بەڕێوەبەرانەى كە لە جێگاى مامۆستایان سەفەرى توركیایان كرد ئەمانەیە:

1- یوسف سورچى : بەڕێوەبەرى گشتى وەزارەتى پەروەردە، دەرچووى كۆلێژى شەریعەیە/ ئەم خواناسە چوار ساڵان لە كۆلێژ ئایەتى قورئان و فەرموودەكانى پێغەمبەرى(د.خ) خوێندووە ، بەڵام كە كۆلێژى شەریعەى تەواو كرد سوێندى خواردووە كە بەتەواوى پێچەوانەى قورئان و فەرموودەكانى پێغەمبەر رەفتار بكات، بەڕاستى پیاوێكى ماندوو نەناسە هیچ سەفەرێكى دەرەوە نی یە لە وەزارەتى پەروەردە بەشدارى لێ نەكات.

2- بورهان ئەرگوشى: پاڵەوانێكى ترى سەفەرەكەى توركیایە، ئەم زاتە موبارەكە بەڕێوەبەرى گشتى سەرپەرشتیارانە بە بێ ئەوەى یەك ڕۆژیش سەرپەرشتیارى كردبێت بەڵام بە (قودرەتى قادر) بووە بەڕێوەبەرى سەرپەرشتیاران ، كاتى خۆى لە (ناحیەى هەریر) بەڕێوەبەر بووە بەڵام (لیژنەى تەحقیقى) لەسەر دانراوە، دواتر ترفیعى بۆ كراوە ئێستاش لەبەر ئەوەى ئەرگوشى یە پیاو نى یە بتوانێ بكۆخێ لە وەزارەت.

3- دانا محەمەد : بەڕێوەبەرى خوێندنى نمونەیى لە وەزارەتى پەروەردە / بەڕاستى خوێندنى نمونەیى لە كوردستان بەڕێوەبەرى ئەوها نمونەیى پێویستە،دیارە ئەم قارەمانە هەروەكو (نمونە)ى بەڕێوەبەرێكى نمونەیى بەشدارى سەفەرەكەى كردووە.

4- كاك شەعبان: بەڕێوەبەرى خۆیەتى وەزارەتى پەروەردە / ئەویش بەبێ ئەو خۆشەویستانەى وەزارەتەكەى كە لە سەرەوە ناویان هاتووە سەبر و ئۆقرە ناگرێت و زۆر غەریبیان دەكات بە بێ ئەوان ناتوانیت یەك ڕۆژ دەوام بكات بۆیە سەفەرى لەگەڵ كردن.

لەگەڵ خۆشیان لە جیاتى زانستى تاقیگە وێنەى جوان و شوێنەوار و شتى سەیر و سەمەرە و نوكتەى شەخسى خۆیان دەهێننەوە و دەیكەنە دیارى بۆ قوتابیانى كوردستان و بەم شتانە پەروەردەو زانستى هەرێمى كوردستان و پرۆسەى خوێندن و سیستەمى نوێى پەروەردە پێش دەخەن، بەڵێ ئەمانەن رابەر و پێشڕەوانى سیستەمى نوێى پەروەردەى هەرێمى كوردستان!!





دڵسۆزێكى كوردستان