(هەر گەلێك بەئازارەکانی خۆی پێبکه‌نێت، ئەوا دڵ بەو گەلە خۆش مەکە کە گەل بێت)*

گەر مانعی حقوقی میللەتی کورد ببێ عەرەب
بێشوبهە نوێژەکانی مازیم بە کوردی قەزائەکەم (شێخی نەمر)

شێخی نەمر ئاوا پەروەردەمان ئەکا و ئاوا نیشتمان و نەتەوەی کورد ئەپارێزێ. کەچی ئەمرۆ نەك هەر کوردستان لەمەترسی و لەناوچووندایە، بەڵکە زمان و کەلتوورە ڕەسەنەکەشی لەژێر ڕەحمەتی دەسەڵاتی پیسخۆر و گەندەڵ و مافیایی پارتی و یەکێتیە.
ڕەنگە لای من گرنگ نەبێ گەر هەموو کوردستانمان داگیربکرێ و بست بەبستیمان لەکیس بچێ؛ لێ زۆر لەوە گرنگتر لام ئەوەیە کە زمان و کلتوورمان بەزیندوویی بمێنێتەوەو بیپارێزین. هەر بۆ نمونە هەندێ لە فەرەنسیەکان لە بەشێکی ووڵاتی کەنەدا کەوا بە(کیوبیكQuebec)ناسراوە، گەر بیانەوێ ئەتوانن لە کەنەدا داببڕێن و سەربەخۆیی خۆیان ڕابگەیین. ئەویش تەنها لەبەرئەوەی توانیویانە لەدوورە ووڵاتی خۆیان کەلتوورو زمانی فەرەنسی بپارێزن.

نوێنەری کوردان میللەت فرۆشان
هەرزە وەکیلی شاری خامۆشان (پیرەمێرد)

بنوارە،بەرپرس و نوێنەرەکانی کورد چ لەناوەو چ لەدەرەوە،چەند ئەوەندەی لەخەمی پۆست و گیرفان و پارەدان، ئەوەندەش خەمساردن بەرانبەر بەزمانی دایکمان. ئەوە ماوەی ٢٢ ساڵە کوردستانی باشوور سەربەخۆیە، کەچی نامان بینی و نەمان بیست ، ڕۆژێك لەسەرکردەکانی کورد و نوێنەرانیان لەپەرلەمان و وەزارەتەکان بەگشتی و وەزارەتی ڕۆشنبیری بتوانن کەڵك و قازانج بەزمانی کوردی و کلتوورەکەی بدەن. لەماوەی ئەو هەموو ساڵەدا کەچی پەرلەمانەکەی خۆمان گشت نووسینە فەرمیەکانیانە بەزمانی عەرەبیە. لەزۆربەی زۆری کوردستاندا ئەوەندە ناوی عەرەبی و بێگانە بەکاردێ بۆ بواری ئابووری و بازرگانی ،ڕەنگە نیو ئەوەندە برەو بەزمانی کوردی نەدرێ. خۆ ئەوە باس لەوەناکرێ کەئەو کەسایەتیانەی بەرپرسیاریان هەبوو لەبواری ڕاگەیاندن و ڕۆشبیبری چەند کەسانی ناکاراو نەشارەزابوون. هەر بۆ نمونە لە فەلەکەدین کاکەییەوە دەست پێ بکە تا ئەگاتە عیماد ئەحمەد و سەفین دزەیی، بابزانین ئەوانە کامیان کوردیەکی ڕەوان و بەسەلیقە ئەزانن تا پۆستی وەزارەتی ڕۆشنبیری وەرگرن؟!

لەخۆڕایی نیە ئەمڕۆ ئەو هەموو بودجەیە لەسەر تێکشاندنی زمانی کوردی و لەبەرانبەردا گەشەو برەو بەزمانەکانی عەرەبی و تورکی و فارسی لەکوردستاندا ئەدەن و چەندین کۆلیژو خوێندگا دەرگایان خستۆتە سەرپشت بۆ لەناوبردنی زمانی کوردی . ئاخر کاری وا چۆن ئەبێ ببێ و لەکاتێکدا هیچ کام لەو ٣ دەوڵەتە سەردەستە ئامادە نیە هەمان کاری ئەوان بکاو بهێڵێ زمانی کوردی و خوێندگای کوردی بکرێتەوە؟!
گەر چاوێك بە قۆناغی (٥)بنەڕەتی و بخشێنین، ئەوا لەپەرتووکی کوردیدا لەجیاتی ووشەی بەلوعە ووشەی(شێرە)بەکاردێ.. ئەگەر چی ووشەی بەلوعە کوردی نیە ، لێ نازانین بۆچی و لەسەر چ بنەمایەکی زمانەوانی ئەو ووشە نوێیە بەکاردێ؟ کام لیژنەی سەر بە وەزارەتی پەروەردە وەیان ڕۆشنبیری بەرپرسیارن لەداڕشتنەوەو وەرگێڕانی ئەو ووشانەی ئەبێ بکرێنە کوردی؟ هیوادارین ئەوە تەنها هەڵەیەکی زمانەوانی بێت و جوغز(مەبەست)شوێندنی زمانی کوردی نەبێت و نەبێتە هۆکارێك بۆ ئەوەی خۆمان بەزمانی خۆمان پێکەنینمان بێت، هەروەك چۆن مۆنتسیکۆ ئەڵێ(هەر گەلێك بەئازارەکانی خۆی پێکەنی، ئەوا دڵ بەو گەلە خۆش مەکە کە گەل بێت)