مەسعود بارزانى، سەرۆكەك وەك جەنابێ تە مە نە گەرەكە

دجەند سەدەیێن رابورى دا بەردەوام میللەتێ كورد دنەهامەتى و نەرەحەتیاندا دژیان، بەردەوام رەڤین وكیمیاباران وهنداكرن ونەفیكرن ژیانا وان بو، تورك وعەرەب وفارس دوژمنێن مە بوون،بەلێ لاو وخورتێن كورد بێ هیڤى نەبون و بەردەوام بون لسەر خەباتێ هەتا سەرهلدانا 1991 كو شیان ڤێ هەریمێ بدەست خۆ ڤە بینن، ئەو بەرخودان و خەبات بۆ وێ یەكێ بو، داكو ب ئازادى بژین و بزمانێ خو باخڤن وكەس تەعدایێ ل وان نەكەت و لسەر ئاخا خۆ بسەربەستى بژین، بەلێ مخابن ئەوا ئیرۆ ل هەرێما كوردستانێ روددەت، هەر وەكى خەبات و بەرخودانا لاوێن كورد ب هەدەر چوبیت، راستە ئەم كورد بخۆ سەرۆكایەتیا ڤێ هەریمێ دكەین، بەلێ چ سەروكایەتیەك سەد حەیف ومخابن! هەتا ئەم ژ دیكتاتورەك عەرەب و خوین مێژ قورتال بوین،نها ئەم دبن سیبەرا دیكتاتورەكێ كورد دا دژین، ئەوژى ژ بنەمالا مەلا مستەفا بارزانى یە.
مسعود بارزانى پشتى ب رێژەیا 70% یا دەنگان ب تەزویر بدەست خۆ ڤە ئیناى ئێدى دگەل ئەندامێن پارتا خۆ هار بون و بەربونە گیانێ ڤى میللەتى، هەر وەكى ئێدى هەلبژارتن نە هێنەكرن و بۆ هەتا هەتا ئەو سەرۆك بیت.
مەسعود بارزانى ئەوا تو ئیرۆ بسەرێ ڤى میللەتى دئینى بەرى تە دوژمنێن كوردا بسەر واندا دئینان، ئەوێت دەنگ دایە تە بۆ هندێ دەنگ نەدایە تە داكو تو مە ژ ئازادیێ محروم كەى و لاوێن كورد بكوژى وزمانێ مە ببرى و هەر رۆژێ گوڤار و رۆژنامەڤانەكى سزابدەى، ما نە تو بوى تە دگوت: ئەم دگەل ئازادیا رەئى دەربرینێ نە، یان نوكە گەندەلى و دزیێن حزباتە دهێنە ئاشكراكرن، لەورا تو كەتیە گیانێ رۆژنامەڤانان.
مەسعود بارزانى راستە ل بەهدینان خەلك ناچیتە سەر شەقامان، بەلێ گەلەك خەمبارن بەرامبەرى رەفتارێن تە، ئەگەر ئیرۆ بێ دەنگ بن، ل رۆژا دەنگدانێ بێ دەنگ نامینن،ب دەنگێ خۆ دێ تە گوهورن، ئیرۆ ژترسا بنەمالا تە جورئەت ناكەن لدژى تە خوەنیشاندانێ بكەن، چونكە دێ هەمیان سەرهنداكەى و دێ بدەهان لاوان كوژى وهەر كەسێ باخڤیت دێ زمانێ وى برى، چونكە پارتى حزبەكى دیكتاتورە و رۆژ بو رۆژێ دیكتاتوریا خۆ بسەر خەلكێ كوردستانێ دا دسەپینیت.
لدیڤ هزرا تە یا عەشائیرى نابیت كەس خونیشاندانێ بكەت، نابیت كەس ب ئازادى رەئیا خۆ بیژیت، نابیت كەس بەحسێ گەندەلى و دزیێن تە وپارتا تە بكەت، نابیت كەس دەعوا مافێ خۆ بكەت، هەمى پارەیێ ڤى میللەتى ددەستێ تە ودارودەستەكێن تە دایە و نابیت كەس بەحسێ وى پارەى بكەت و بوچى بتنێ بۆ بنەمالا بارزانى بیت گەلو ما بەس مالا بارزانى كوردستان رزگاركرنە؟!
مەسعود بارزانى سەرۆكەك وەك جەنابێ تە بۆ ڤێ هەرێمێ نە گەرەكە،پێدڤیە هەمى خەلكێ كوردستانێ پێكڤە شورەشەك مەزن بكەن داكو ڤان دیكتاتورێن ل هەرێما كوردستانێ هەنە ژناڤببەن ونەهێلن چ كەسەكى دى دیكتاتوریەتێ بسەر مەدا بسەپینت.