نامه‌ى دووه‌م بۆ سه‌رۆكى هه‌رێمى كوردستان

عبدالله م ماوه‌یه‌ك له‌مه‌وبه‌ر له‌ رێگه‌ى سایتێکه‌وه‌ نامه‌یه‌ك له‌لایه‌ن چه‌ند فه‌رمانبه‌رێكى ئامارى پارێزگاكانى هه‌ولێر، دهۆك و سلێمانى ئاراسته‌ى جه‌نابتان كرا له‌سه‌ر بارودۆخى ده‌سته‌ى ئامارى هه‌رێم و گه‌نده‌ڵیه‌ ئیدارییه‌كانى نێو وه‌زاره‌تى پڵان دانان و ده‌سته‌ى ئامارى هه‌رێم و به‌ڕێوه‌به‌رایه‌تییه‌كانى ئامارى پارێزگاكانى سه‌ر به‌م ده‌سته‌یه‌، به‌ڵام به‌داخه‌وه‌ هیچ به‌دواداچوونێكى ئه‌وتۆمان نه‌بینى بۆ چاره‌سه‌ر كردنى كێشه‌كان ته‌نیا ئه‌وه‌ نه‌بێت كه‌ به‌ر له‌ چه‌ند رۆژێك به‌ڕێوه‌به‌رى ئامارى پارێزگاى هه‌ولێر لابرا و كه‌سێكى تر شوێنى گرته‌وه‌. ئه‌مه‌ش هه‌رچه‌نده‌ كارێكى باش و به‌جێ بوو به‌ڵام ئه‌و كاریگه‌رییه‌شى نابێت كه‌ هه‌موو كێشه‌كان چاره‌سه‌ر بكات. له‌به‌ر ئه‌مانه‌ و له‌به‌ر ئه‌وه‌ى نوسه‌رانى نامه‌كه‌ى پێشووتر داواى یارمه‌تیان له‌و كه‌سانه‌ كردبوو كه‌ زانیارییه‌كیان له‌سه‌ر ئه‌م بابه‌ته‌ هه‌بێت و له‌به‌ر ئه‌وه‌ى منیش له‌ دووره‌وه‌ تا راده‌یه‌ك ئاگادارى ئه‌و كێشه‌ و گیروگرفتانه‌ بووم و هه‌روه‌ها دواى ئه‌و بابه‌ته‌ش كه‌ له‌ سایتى كوردستانپۆست له‌سه‌ر گه‌نده‌لییه‌كانى وه‌زاره‌تى پڵان دانان بڵاو كرایه‌وه‌ (وه‌زراه‌تى پڵان دانان یان وه‌زاره‌تى گه‌نده‌ڵ دانان)، به‌ پێویستم زانى كه‌ من نامه‌ى دووه‌م ئاراسته‌ى به‌ڕێزتان بكه‌م.
من بڕیارمداوه‌ كه‌ زۆر نه‌نووسم و له‌ جیاتى نووسین چه‌ند به‌ڵگه‌یه‌ك بخه‌مه‌ روو كه‌ باس له‌و ناكۆكى و ێراعه‌ ده‌كات كه‌ له‌ نێو ئه‌و كۆمه‌له‌ كه‌سانه‌ى ناومان بردن هه‌یه‌.
به‌ڵگه‌نامه‌ى یه‌كه‌م نووسراوى وه‌زاره‌تى پڵان دانانه‌ (ژماره‌ 1819 له‌ 20/5/2009) سێ خاڵى تایبه‌ت به‌ ده‌سه‌ڵاته‌كانى ئه‌و كه‌سانه‌ى كه‌ به‌ڕێوه‌به‌رانى ده‌ره‌وه‌ى دیوانى وه‌زاره‌ت و سه‌ربه‌ ده‌سته‌كان یان به‌ڕێوه‌به‌رایه‌تییه‌ گشتییه‌كانن و هه‌روه‌ها ئه‌و كه‌سانه‌ش كه‌ له‌كاتى ئاماده‌ نه‌بوونى به‌رپرسانى پڵه‌ى تایبه‌ت له‌ شوێنیان ئیش و كاره‌كان به‌ڕێوه‌ ده‌به‌ن له‌خۆ ئه‌گرێت. له‌ خاڵى دووه‌م باس له‌وه‌ ئه‌كات كه‌ هیچ به‌ڕێوه‌به‌رێك بۆى نییه‌ نووسراو ئاراسته‌ى وه‌زاره‌ت بكات به‌ شێوه‌ى راسته‌وخۆ و ئه‌بێت به‌ پێى زنجیره‌ى كارگێڕى بێت، ئه‌مه‌ له‌ كاتێكایه‌ كه‌ خودى وه‌زیر چه‌ند جار به‌ نهێنى جێگرى سه‌رۆكى ده‌سته‌ و به‌ڕێوه‌به‌رانى ئامارى پارێزگاكانى بانگ كردووه‌ و دوور له‌ چاوى سه‌رۆكى ده‌سته‌ و به‌ نهێنییه‌وه‌ كۆبوونه‌وه‌یان له‌گه‌ڵ كردووه‌! و هه‌روه‌ها خودى به‌ڕێوه‌به‌رى گشتیى دیوانیش هه‌موو ئه‌و نووسراوانه‌ى كه‌ له‌ ئامارى پارێزگاكانه‌وه‌ بۆیان ئه‌چن وه‌رئه‌گرێت و واردیان ده‌كات و ئیش و كاره‌كانیشیان زۆر به‌ رێك و پێكى و به‌ خێرایى رایى ئه‌كات!!! له‌ خاڵى سێیه‌میش باس له‌وه‌ ئه‌كات كه‌ به‌ڕێوه‌به‌ره‌ گشتییه‌كان و ته‌نانه‌ت سه‌رۆكى ده‌سته‌ش بۆى نییه‌ نووسراوى راسته‌وخۆ بۆ پارێزگا بكات و ئه‌بێت به‌ ئیمزاى وه‌زیر بێت. ئاخۆ له‌ ووڵاتى ئێمه‌ پڵه‌ى پارێزگار و وه‌زیر وه‌كو یه‌كن وله‌ یه‌ك ئاستدان؟!
به‌ڵگه‌نامه‌ى دووه‌م نووسراوێكى ده‌سته‌ى ئامارى هه‌رێمه‌ (ژماره‌ 623 له‌ 17/6/2009) كه‌ بۆ وه‌زیرى پڵان دانان كراوه‌ و تیایدا باس له‌وه‌ ئه‌كات كه‌ وه‌زیر دوور له‌ هه‌ر بنه‌مایه‌كى ئیدارى و به‌بێ ره‌چاو كردنى هیچ بنه‌مایه‌ك و هیچ به‌رژه‌وه‌ندییه‌كى حكومه‌تى هه‌رێم به‌ ته‌له‌فۆن په‌یوه‌ندى به‌ به‌غداوه‌ كردووه‌ و بریكارى وه‌زیرى پڵان دانانى عێراقى له‌وه‌ ئاگادار ئه‌كاته‌وه‌ كه‌ چیتر سه‌رۆكى ده‌سته‌ به‌رپرسى سه‌رژمێرى نییه‌ له‌ كوردستان و به‌ڕێوه‌به‌رى ئامارى سلێمانى به‌رپرسى سه‌رژمێریى كوردستانه‌، ئه‌مه‌ له‌ كاتێكدایه‌ كه‌ هیچ فه‌رمانێكى تایبه‌ت به‌مه‌ ده‌رنه‌چووه‌ و وه‌زیرى پلان دانان تاك لایه‌نه‌ و زۆر سه‌ره‌رۆیانه‌ ئه‌م بڕیاره‌ى ده‌ركردووه‌!
به‌ڵگه‌نامه‌ى سێیه‌م نووسراوێكى ترى ده‌سته‌ى ئامارى هه‌رێمه‌ كه‌ بۆ نووسینگه‌ى وه‌زیرى پڵان دانان نێردراوه‌ و به‌ دووپات كردن له‌سه‌ر نووسراوێكى پێشووتر، باس له‌ نه‌ناردن و شاردنه‌وه‌ى به‌ڵگه‌نامه‌ى به‌ڕێوه‌به‌رى ئامارى سلێمانى ئه‌كات بۆ ده‌سته‌ى ئامارى هه‌رێم به‌هۆى ئه‌وه‌ى به‌ڵگه‌نامه‌ى ناوبراو ساخته‌ و ته‌زویره‌!!! لێره‌دا جێى خۆیه‌تى ئاماژه‌ به‌وه‌ بكه‌ین كه‌ پڵه‌ى به‌ڕێوه‌به‌رى ئامارى سلێمانى راوێژكار-ه (كوێر بێت چاوى حه‌سود)!
من نامه‌وێت باس له‌ گرنگى ئامار و داتا و پڵان دانان و هه‌موو ئه‌م شتانه‌ بكه‌م بۆیه‌ ته‌نیا داوا له‌ به‌ڕێزتان ئه‌كه‌م كه‌ به‌ په‌ڵه‌ له‌م رووداوانه‌ بكۆڵنه‌وه‌ و چاره‌سه‌رێكى راست و دروستیان بۆ بدۆزنه‌وه‌.

له‌گه‌ڵ رێزمدا...
به‌ڵگه‌کان:
https://www.kurdistanpost.com/biz/pdf_files/wazaratiplangandal.pdf