خەڵاتەكەى سەرۆك !

لەم هەفتانەى رابردوودا سەرۆك كۆمارى عێراق -جەلال تاڵەبانى- چەندین پیاوى سیاسی كوردی بە (دەمانچە)یەكى تایبەت خەڵات كرد. دیاریكردنى (دەمانچە) وەك خەڵاتێكى بەهادار لە تاڵەبانیەوە، وایلێكردم ئەم دێڕانەى خوارەم بنوسم.
مام جەلال كە یەكەمین سەرۆك كۆمارى هەڵبژێراوى دەوڵەتى عێراقى پاش دیكتاتۆریەتە (یا لە راستیدا سەرۆكى وڵاتێكى پاش كۆتایی حكومى دڕندەیەك)، دەبوایە یەكەم كەس و دەستپێشخەر بوایە لەنەعلەت كردنى كلتورى چەك و بەخشینەوەى وەك دیاریەكى (بەهادار)، چونكە لەلایەك: مام جەلال لە سەر ئەرزى واقیع هەموو ئەو دەردەسەرى و ماڵوێرانى و كاولكارییەى بینیوە و ئەزموونى كردووە كە كلتورى و چەك و ئاگر و ئاسن بەرهەمى هێناوە، لەلایەكى دییەوە: مام جەلال رێبەرایەتى دەوڵەتێك دەكات بە حساب بەرەو (دەوڵەتى مەدەنى) و (دیموكراسیەت) هەنگاو دەنێ.
لە راستیدا جێی سەرسوڕمانە كە سەرۆك تاڵەبانى؛ لەو هەموو شتە جوانانەى دونیا شتێكى دی نەدۆزێوەتەوە هێندەى (دەمانچە) بە هادار بێت، تاوەكو بیكاتە دیارى بۆ (تێكۆشەرە دێرنەكان) و (دۆست و هەڤاڵەكانى). لەوەش سەیرتر ئەوەیە هەموو ئەوانەى كە خەڵاتكران نەیانتوانى، نەهاتنەدەنگ یاخود بچرپێننە گوێی سەرۆكەوەو بڵێن: جەنابی سەرۆك سوپاس، ئەگەر ئەزیەت بكێشت دیاریەكەمان بگۆریت بۆ شتێكى مرڤانەتر، بۆ شتێك كە لەگەڵ ئەتەكیەتى دیبلۆماسی و سەدەی بیست و یەكدا بگونجێت؛ تاوكو لە جیگایەكى دیارى ناوماڵەكانما یاخود بارەگا و نوسینگەكانمان بەشانازییەوە هەڵیواسین، دایبنێین.
هەڵبەت سەرۆك لە رێگەى هەڵبژاردنى (دەمانچە) ، پێمان دەڵێت: من هێشتا باوەڕم بە بێزراوى، رقلێبوونەوە، قێزلێكردنەوە و رشانەوەى نیە لە (دەمانچە) و (كلتورى چەك)، هێشتا دەمانچە شیاوى ئەوەیە كە هاوڕێ و دۆستەكانمی پێ خەڵاتبكەم.
لە راستیدا زەحمەتە بۆ من لە نێوان رەتكردنەوەى ئیمزاى لە سێدارەدان و بەخشینەوەى دەمانچە وەك دیارییەكى (بەهادار) لە لایەن تاڵەبانیەوە تێبگەمى !، لەوەش زەحمەتتر تێگەیشتنمە لەوەى كە تاڵەبانى خۆى وەك پیاوێكى بەحەوسەڵەو میانڕەو و (لێكنزیكەرەوەى بۆچوونى پێكهاتە جیاوازكانى عێراق) پیشاندەدات، كەچی (دەمانچە) بە خەڵات دەبەخشێتەوە.
[email protected]