مەسعود بە دوربینێكى گەورە چاودێرى تاڵەبانى دەكات

لەوەیە خەڵك هەبێت وەك و ئۆپۆزسیۆنێك مامەڵە لە گەڵ رووداوەكان بكات، هەشە وەك و لایەنگرى دەسەڵات، هەچەندە من ئەوە ناشارمەوە پێم وایە مانەوەى كۆمەڵێك دەموچاو بۆ ماوەیەكى درێژ لە دەسەڵاتدا شتێكى خراپەو دەبێتە هۆى ئەوەى دەسەڵات بگەنێت و توشى چەق بەستن بێت، بەڵام لە گەڵ ئەمەشدا من زۆر جار خۆم وەك و چاودێرێك دەبینمەوە. بە هەر حاڵ من زیاتر دەمەوێت باسى رووداوەكانى پاش راپەرین بكەم كە خۆم تێیدا ژیاوم، ئەوەى بەدى دەكرێت لە پاش راپەرین كۆمەڵێك شیخ لە جیا هاتنە خوارەوە، زۆربەى كۆمەڵانى خەڵكى كوردستانیش وەك و دەروێش حاڵیان لێ هاتبوو و حەى بەڵێیان بوو لە گەڵ دەف و وتارەكانى شێخەكانى چیادا، ئەم حاڵلێهاتنەى ملەت واى كرد هەر دە پەنجەكانمان لە سەر كاغەزى سپى پێ مۆر بكەن و بەو كاغەزە سپیە ژێرخان و سەرخانمان بە تاڵان ببرێت. ئەوەى شایانى ئاماژە پێكردنە لەم بابەتەدا ئەوەیە جەماوەر زیاتر بوونە دوو بەشەوە:
بەشێكى دەروێشە راستەقینەكان بوون كە جەماوەرە شۆرشگێرەكە بوون كە زۆربەیان بوونە لایەنگرى یەكێتى، بەشەكەى دیكەشى ئەو خەڵكە بوون كە ژیانى خۆیان هەڵبژاردبوو و بوونە پارتى لەبەر ئەوەى وتارى پارتى نەرمتر بوو ولەگەڵ رێكەوتن لە گەڵ سەدام بوو و هەروەها بووە پەناگاى زۆربەى كۆنە سەرۆك جاش و جاشەكان ئەمە هەرچەندە بیرۆكەى لیبوردن لە جاشەكان لە ئەساسدا بیرۆكەى یەكێتى بوو نەك پارتى. ئیتر تاڵەبانى پاش راپەرین لەبەر ئەوەى جەماوەرە شۆرشگێرەكەى بەدەستەوە بوو وئەو جەماوەرە ئامادەى هەر قوربانیدانێك بوون، سەچۆپى و سوكانى رەوشەكەى كەوتە دەست و مەسعودیش ناچار بوو دوربینێكى گەورە وەك و ئەوانەى ناسا بكرێت و تەماشاى تاڵەبانى بكات بۆ ئەوەى ئەو هەرچى كرد ئەم لاسایى بكاتەوە، واتە پێنان بە جێگاى پێى تاڵەبانیدا، تەماشا بكەن پارتى هەموو كاتێك كۆنگرەى خۆى دوا خستووە تا بكەوێتە پاش كۆنگرەى یەكێتى بۆ ئەوەى بزانن لە كۆنگرەى یەكێتیدا چى رووى داوە، یەكێتى لە ناوچەكانى خۆى كاتى خۆى هەڵبژاردنى شارەوانیەكانى كرد ئینجا پارتیش كردى، یەكێتى ئاسیاسێڵى هێنا ئینجا ئەوانیش كۆرەك، بە دەیان و سەدان نموونەى ترى وا هەیە. هەروەها لە حكومەتەكەى یەكەمدا سەرەراى ئەوەى پارتى شتێك لە یەكێتى زیاترى هێنا بەڵام جەماوەرى یەكێتى لە رووى جۆرەوە پارتى ناچار كرد حكومەت تەسلیمى یەكێتى بكات، بەڵام مەسعود لە شتێكدا زۆر درەنگ لاسایى تاڵەبانى كردەوە، ئەوەش هێنانى دەبابەى رژێم بۆ سەر خاكى كوردستان كە ئەم جارەیان مەسعود پاش سى ساڵ (66) ى دووبارە كردەوە لە (31) ى ئابدا.