ئاودیوكردنى نەت و كاریگەرى لەسەر لاوازبوونى ئینتیماى نیشتمانى

چەند ساڵێكە لە میدیاكان و كۆڕو كۆبوونەوەكاندا باس لەلاوازى ئینتیماى میللى و نیشتیمانى دەكرێ و چەند هۆكارێكیش باس دەكرێ زۆرێكیان ڕاستن، دیارە گەلى كورد خەبات و ڕاپەرینى بۆ ئەوە كرد لەژێر چنگى تاغوت و داگیركەران ڕزگارى بێت و مافى ڕەواى خۆى وەرگرێتەوە و سەربەست وئازاد بێت وەك هەر گەڵێكى جیهان چونكە خەبات وڕاپەڕین بۆ پاراستنى خاك و زمان و كولتورو بیروباوەڕى گەل دەكرێت كەچى لاى ئێمە لەسایەى حكومەتى هەرێمدا بەجلى كوردیەوە كەبەشێكە لەكولتورى میللەتەكەمان لەقوتابخانەكاندا دەوام كردن قەدەغەیە، ئەمەش هۆكارێكى ترى لاواز بوونى ئینتیماى نیشتیمانى یەو نیشانەى پرسیارو سەرسوڕمانى دەوێ و جێی نیگەرانییە. بەڕاى من هۆیەكى تر كەلەهەمووى كاریگەرترە ئەوەیە لەكاتێكدا هاوڵاتیان بەسەر بەحرێك نەوتەوە بەزستاندا تەقەى ددانیان دێت و هاوینانیش غەرقى عارەقن بەبەرچاوى میدیاكانى ناوەوەو دەرەوە ڕۆژانە 1112 تەنكەر نەوت لەهەرسێ مەرزى (حاجى ئۆمەران - باشماخ - پەروێزخان) وە لەیەك ڕۆژدا ئاودیو دەكرێت و وەزیرى سامانە سروشتى یەكان دەڵێ داهاتەكەى بەحسابێكى تایبەت دەچێتەوە وەزارەتى دارایی و وەزیرى دارایش بێ ئاگایی خۆى نیشان دا جاوەرە ئەم مەتەڵە هەڵ بێنە. سەیرە پاش چەندەها ساڵ بەقاچاغ بردن و هەڵ لوشینى مافى بێوەژن و منداڵى هەتیوى ئەم گەلە هەژارە تازە باسى فۆرۆشتنى دەكرێت بەمزایەدە ئەویش بەو نرخەو بەو كۆمپانیایەى كە خۆیان دەیانەوێت. بۆیە ئەوە كاتێك بوو هەستى میللى و نیشتمانى زیندوو بوو كە هەمووكەس ئامادەبوو وەك چوار ئەفسەرە نەمرەكە و پێشەوا قازى محمد لەڕێى بیروباوەڕو بەرژەوەندى گەلەكەیان دا گیانیان بەخت بكەن ، ئەوە كاتێك بوو كەهێمنى شاعیر دەیووت :
عاشقى چاوى كەژاڵ و گەردنى پڕ خاڵ نیم عاشقى كێوو تەڵان و بەندەن وبەردم ئەمن
بەڵام ئێستا كە حیزبایەتى و دەسەڵات داران لەسەرووى یاساوەن و بەدرێژى وپانیا ڕایدەكێشن و هەڵس وكەوتى لێپرسراوان واى كردووە یاسا تەنها بۆ بێ دەسەڵات وهەژاران سەروەرەو بەسەرپێچی یەكى بچوك ناوى دەزڕێنن و بەڵام خۆیان سامانى ووڵاتێك بەنایاسایی ئاودیو دەكەن عالەمیش باسیان دەكات وەك گیزەى مێشوولەیش نایبیستن. لەم بارودۆخەدا ئەو فەرمودەیەى پێغەمبەرم (ێ) دێتەوە یاد كەفەرموویەتى (وەك نەتەوەكانى پێش خۆتان مەبن ئەگەر بەهێزێكیان دزى بكردایە وازیان لێ دەهێنا بەڵام ئەگەر بێهێزو لاوازێكیان دزى بكردایە سزایان دەدا سوێند بەوەى نەفسی منى بەدەستە ئەگەر فاتمەى كچى محمد دزى بكات دەستى دەبڕم) هەزار ڕەحمەت لەپیرەمێردى فەیلەسوف فەرموویەتى : دزى ملیۆنێر پێى سەرئەفرازە بۆ ئانە دزە ئەم شەق و گازە
بەداخەوە ئەمڕۆ كاربەدەستان بۆ گەیشتن بەپلەو پایەو پۆست و گیرفان پڕكردن هەموو ڕێیەك دەگرنە بەرو خۆشگوزەرانى مەست وسەرخۆشى كردوون ئاگایان لەنیشتیمان و گەڵ و وڵات نەماوە . كوردى دڵسۆز ئەو كەسەیە كە هەڵگرى خەمى گەلەكەى بێت وەك بێكەس دەڵێت :
پیاوئەبێ دایم خەمى قەوم و وڵاتى خۆى هەبێ ** ئەو كەسانەى بێ خەمن حاشانەوەى ئەم خاكەنین .