گازیه‌ك بۆ خۆنیشانده‌رێن سه‌رایا ئازادیێ و هه‌می خه‌لکێن کوردستانێ

ئه‌ڤه‌ ژ هه‌یڤه‌کێ پتره‌ کو خه‌لکێ سلێمانیێ ل سه‌رایا ئازادیێ کۆم بوونه‌. ئه‌و و هه‌می خه‌لکێن کوردستانێ داخوازا چاکسازی و نه‌هێلانا گه‌نده‌لیێ و بنبڕکرنا دزیێ دکن، به‌لێ هه‌تا نها، نه‌ مه‌سعوود بارزانی و نه‌ جه‌لال تاله‌بانی، نه‌ به‌رهه‌ڤن کو ده‌ست ژ دزی و گه‌نده‌لیێ به‌ردن و ده‌ست ب چاکسازیێ بکن. نه‌کو ئه‌ڤه‌ بتنێ، به‌لکو به‌رگه‌ڕهانا دکن کو نه‌هێلن کو خه‌لکێن ده‌ڤه‌رێن کوردستانێ خۆنیشاندانا بکن و خۆنیشاندانا سه‌رایا ئازادیێ ژی ژناڤ ببن، داکو هه‌ر ل سه‌ر دزی وگه‌نده‌لیێ به‌رده‌وام بن. ئو چ نیشان ژی نینن کو دێ ل خۆ زڤڕن و ده‌ست ب چاکسازیێ کن، له‌وا داخوازێ ژ خۆنیشاندانێن سه‌رایا ئازادیێ و هه‌می خه‌لکێ کوردستانێ دکم کو ئێدی درووشمێ چاکسازیێ بلند نه‌کن، به‌لکو درووشمێ هه‌ڕفاندنا دکتاتۆریا مه‌سعوود و جه‌لالی بلند بکن.

وه‌کی دیار مه‌سعوود و جه‌لال چام و عبره‌تا ژ خه‌لکێن دی وه‌رناگرن. عه‌لی عبدالله سالحێ یه‌مه‌نێ ژی وه‌کی وان خۆ ب زڕته‌کیێ ئیناده‌ر و خه‌لك کوشتن، ئو ره‌شه‌کێن خوه‌ ب خۆنیشانده‌ران را به‌ردان، به‌لێ رژدبوونا خه‌لکی ل سه‌ر درووشمێ هه‌ڕفاندنا رژێما وی ئه‌و نه‌چارکر کو ل به‌ر بێت و ده‌ستی ژ کاری به‌ردت. ئو قه‌زافیێ براماکێ مه‌سعوود و جه‌لالی ژی خۆ ب زڕته‌کیێ ئیناده‌ر، ب تۆپ و ده‌بابه‌ و باله‌فڕا ل گه‌ل خه‌لکی ئاخت و هه‌ژار و به‌له‌نگازێن وه‌لاتێ خۆ کوشتن، لێ پشتی کو هێزێن ناڤ نه‌ته‌وی هاتن سه‌ر خێزێ، کونمشك ل قه‌زافی بوونه‌ قه‌یسه‌ری و ئیرۆ لاڤلاڤا ویه‌، ئو بۆ ژناڤ چوونا وی چ نه‌مایه‌.

ڤێجا مه‌سعوود و جه‌لال ژی نابن خۆشمرۆڤ هه‌تا کو کولمه‌کا وه‌سا ب دفنا وان ژی دکه‌ڤت. ئو گاڤا کو پێ که‌ت ژی هینگێ لاڤلاڤا وان دێ بێ مفا بت.

له‌وا داخوازێ ژ هه‌می خه‌لکێن کوردستانێ و نه‌خاسمه‌ خۆنیشانده‌رێن سه‌رایا ئازادیێ دکم کو ڤێجا درووشمێ هه‌ڕفاندنا دکتاتۆریا مه‌سعوود و جه‌لالی بلند بکن.