بۆ ڕای گشتی هه‌ڕه‌شه‌ی كوشتن له‌ ستافی پێگه‌ی ستانده‌ر ده‌كرێت

بۆ سه‌رۆكی ئه‌نجومه‌نی وه‌زیران
بۆ سه‌ندیكای ڕۆژنامه‌نوسانی كوردستان
بۆ ڕێكخراوه‌كانی كۆمه‌ڵگای مه‌ده‌نی
بۆ ڕای گشتی

هه‌موو لایه‌ك ئاگادار ده‌كه‌ینه‌وه‌ كه‌ به‌هۆی ئه‌وه‌ی پێگه‌ی ستانده‌ر هه‌ڵده‌ستێت به‌ بڵاوكردنه‌وه‌ی هه‌واڵه‌كانی بازنه‌ی خۆپیشاندانه‌كانی كوردستان به‌ شێوه‌یه‌كی ڕاست و دروست و پشت به‌ستن به‌ په‌یامنێره‌كانی و گه‌یاندنی ڕاستی ڕووداوه‌كان و به‌مینبه‌ربوونی ستانده‌ر بۆ دژه‌ گه‌نده‌ڵی، له‌م ماوه‌یه‌دا له‌ لایه‌ن چه‌ند كه‌سێكی نه‌ناسراو و نه‌فس نزمه‌وه‌ له‌ ڕێگه‌ی ته‌له‌فۆن و مه‌سج و ئیمه‌یله‌وه‌ هه‌ڕه‌شه‌ی كوشتن له‌ گیانی ستافی پێگه‌ی ستانده‌ر ده‌كرێت له‌ پێناو كپكردنی ده‌نگی ئازادی ستانده‌ر.
لێره‌وه‌ پاراستنی گیانی په‌یامنێران و ستافی پێگه‌كه‌مان ده‌خه‌ینه‌ ئه‌ستۆی به‌رپرسان و ئاسایشی كوردستان، وه‌ داوایان لێده‌كه‌ین كه‌ ڕێگری بكه‌ن له‌و هه‌ڕه‌شانه‌ و چیتر گیانی ڕۆژنامه‌نوسان حه‌ڵاڵ نه‌كرێت.
به‌و كه‌س و گێره‌ شێوێنانه‌ و نه‌فس نزم و دۆڕاوانه‌ ده‌ڵێین و دوپاتی ده‌كه‌ینه‌وه‌ كه‌ پێگه‌كه‌مان به‌رده‌وام ده‌بێت له‌ گه‌یاندنی زانیارییه‌كان و ئه‌و هه‌ڕه‌شانه‌ی ئێوه‌ش ده‌بێته‌ گڕوتینێكی زیاتر و هانده‌ری زیاترمانه‌ بۆ ئاشكراكردنی ڕاستییه‌كان و هه‌ڵماڵینی په‌رده‌ له‌سه‌ر گه‌نده‌ڵی به‌رپرسه‌كان.
پێتان ده‌ڵێین ئێمه‌ به‌ سكاڵای یه‌ك ملیۆن دۆلاری و به‌ناحه‌ق سه‌ندنی 6 ملیۆن دینار نه‌ترساین و گوڕوتینی زیاترمان بۆهات و ئه‌وه‌نده‌ی تر خۆمان یه‌كلا كرده‌وه‌ بۆ ئه‌م كاروانه‌ پڕشكۆیه‌.
مژده‌شتان ده‌ده‌ینێ كه‌ ئێمه‌ له‌ دوای شه‌هیدبوونمان ستافێكی ترمان ئاماده‌كردووه‌ بۆ به‌رده‌وامبوونی ستانده‌ر و به‌رده‌وام ده‌بین و له‌ كۆڵتان نابینه‌وه‌ و واز ناهێنین هه‌تا هه‌موو ئه‌و موڵك و پارانه‌ی كه‌ دزیوتانه‌ بۆ ئه‌م میله‌ته‌ به‌ش مه‌ینه‌تییه‌ نه‌گێڕینه‌وه‌.

ستافی پێگه‌ی ستانده‌ر
12-3-2011