پەیامی پشتیوانی بۆ ئەنجومەنی کاتی مەیدانی ئازادی

خوشکان، برایان، دۆستانی ئازیز
شوباتیەکانی سەرای ئازادی
دوو ڕۆژە هەواڵ بیستی هێرشی هەمەلایەنەی دەسەڵاتین بۆ سەرکوت کردنی ئێوەی ئازادی ئەم بەهارەی کوردستان. دوو رۆژە ئێمەش لەگەڵ خۆڕاگریتاندا دەژین.
ئازیزان، هەرلەسەرتای سەرهەڵدانی بزووتنەوە ی ناڕەزایەتی کوردستانەوە، دەسەڵاتی پارتی و یەکێتی باڵانسیان تێک چووە و ووڕینە دەکەن، دەمێک پێمان دەڵێن گێرەشیوێن و دەستی بێگانە، دەمێکیش دەڵێن داواکانتان ڕەوایە و دەبێت چاکسازی بکرێ، دەسەڵات لەلایەک تەقەمان لێ دەکات و خوێنمان دەڕێژێت و لەلایەکی تریشەوە ئەڵێ ئەمە خوێنی خۆمە و فتوادەرێکی تاوانبار دەنێرێت بۆ خوێن خۆشکردن، بەیانی شاندی گفتوگۆ دەنێرێت بۆ سەرای ئازادی بەڵێنی قورس و قەبە دەدات بە شەقام، کەچی ئێوارە بەین و بەست و سەواو مامەڵە لەگەڵ ئەحزاب دەکات و پاشقول لە شەقام دەگرێت. دەسەڵات هەراسانە و بە دوولای دەمی قسە دەکات، بەڵام هەگبەی درۆ تەسکەو بەری کورت. دەسەڵات هەراسانە و پلان دەگێرێت، وا ئەمڕۆ لە مەکتەبە سیاسیەکانی دوو حیزبی دەسەڵاتەوە، لە دوو کوانوی درۆ و دۆلارەوە، هێلکەی پیلانێکی گەندەڵی تری گەندەڵی، هێلکەی پیلانێکی تری سەرکوتکەر و ئالودەی خوێن ، تروکا.
ئازیزان مەبەست لەم پلانە پەلکێش کردنی شەقامە بۆ شەر، شەڕێک بڕیارەکەی سەری ڕەش داوێتی و قەڵاچوالان جێ بە جێ ی دەکات، شەڕێك کە ئەوان مەیدانەکەی هەڵدەبژێرن و زۆریش شارەزان تیایدا، شەڕی خوێن ڕشتن، ئەوان قارەمانی ئەم جۆرە شەڕەن شەڕی بی کەی سی و "راجیمە حەیاتەکە" بەڵام ئێمە ڕقمان لەم جۆرە شەڕەیە و خۆمانی لێ لادەدەین.
دەسەڵات ئارامی لێ هەڵگیراوە و ئارەزووی خوێن ڕشتن دەکات، قارەمانانی پاراستن و زانیاری هەواڵگیری دەکەن و جفرە دەنێرن بۆ "هەڤاڵانی سەرکردە" و ئەوانیش ئەمر دەفەرمون دەمامکراوەکان ڕووی دەمی بی کەی سی بکەنە سنگی شەقاری شەقام، ئەو جەنابانە دەمانچەکانیان بە ڕووتی ڕاکێشاوەو مەیلی تەقە دەکەن، دەیانەوێت شەقام ڕاکێشنە مەیدانی ئەم جۆرە شەڕە.
خوشکان و برایان ئازیز، ئەم پلانەی دەسەڵات دەبێت پوچەڵ بکرێتەوە، ئەم کارەش تەنها بە فراوانکردنەوەی بزووتنەوەکەمان و رێکخستنێتی لە ئاستی ناوەوە و دەرەوەی ووڵات. ئێمە لە پشتانین بۆ ئەنجام دانی ئەم کارە.
ئازادی لە شەقامەوە سەر دەردێنێ!
ئەنجومەنی کاتی تۆرۆنتۆ بۆ پشتیوانی کردن لە خۆپیشاندانەکانی کوردستان
17 نیسانی
 2011