چیرۆکەکانی چیا، ئەو رۆژەی بۆمەرگی جاشێک فرمێسکم ڕشت (چیرۆکی ژمارە ٧)

 لەدۆڵەکەدا هەر پێشمەرگەبوو  لەگەڵ دەستەو تیپ و کەرتەکەیدا لەو جێگەیە کۆبوینەوە کە بڕیاربوو لێیبین ،  ئێمەش  وەک ئەوان  لەوێ یەکمانگرتەوە و سڵاوکردن و یەکتر لەئامێزکردو ڕاموسینی دەموچاوە ڕیشاوی و خۆڵ و ئاراقاویەکانی یەکترمان ڕادەمووسی و هەواڵپرسین و قسەو باس کردن تادەهات درێژەی کێشا 

  پاش ئەوەی کاتبەرەو درەنگی دەچوو ڕۆژ لەدەمی کەلەکانەوە ئاوادەبوو  نهێنی شەو دانراو هەموومان  دەمان زانی ئەم شەو چی دەکەین ، بەڵام نەمان دەزانی  چەندمان  گیان لەدەست دەدەین و شەهید دەبین؟  هەمووجارێک کە ئاوا بۆ چالاکیەکی سەربازی کۆدەبوینەوە  دەستدەکرا بەهەڵپەرکێ و خۆشی وسەماکردن ، پاشان  کەدەکەوتینەڕێ  زۆرجاران سرودی "ئێمەین پێشمەرگەی کۆمەڵەی ڕەنجدەرانمان دەوت"  ئەو  ئێوارەیەش  دەستە، دەستە  بەپێی  ئەو پایگایەی بۆی دانرابوو بەڕێ دەکەوتین ، پلانەکە گرتنی فەوجێکی گەورەی  جاشەکان بوو ، بەداخەوە ئەم شەو دەبوو ئێمە شەڕی ئەوکەسانەبکەین کە هاوخوێنی یەکترین و خەڵکی هەمان نەتەوەو هەمووشمان  کوردبووین . ئێمەش ڕێچکەمان گرت و کەوتینەڕێگە و  نزیک بوینەوە لەو پایگاگەورەی کەبۆمان دانرابوو، ئەوانەی  کە لەناو پایگاکەبوون   وەک ئێمەهاوزمانمان بوون .  خەڵک بەئێمەیان دەوت شۆڕشگێڕو بەوانیشیان دەوت چڵکاوخۆرو خائین و خۆفرۆش و دەیان  ناوی دزێوی تر. سەمەرە لەوەدابوو کاتێک کەسانێک لەناو ئەمانەوە دەهاتنە شاخ، ئیترهیچ بیریان نەدەهێنانەوە کەجاش بوون ، ئەوان دەبونە پێشمەرگە . من نەم بیستوە جاشێک لێپرسینەوەی لەگەڵ کرابێت ، یان هەر پرسیارێکی لێکرابێت کە بۆ بوە بەجاش ؟ کاتێک هاتۆتە چیا ئیتر ئەو وەک ئێمە پێشمەرگە بوە .

 کاتژمێر ١٢شەوبوو  تەقەدەستی پێکرد ، کەدەڵێم تەقە بەجارێک هەزاران گولە بەرەو ئەو مۆڵگای جاشانە ڕۆشت ، لەکاتی شەڕی وادا  کات زوودەڕوات  و نازانی  چۆن کاتژمێرەکان تلدەبنەوە و کاتەکان بەرگەی هیچ ناگرن ، بەڵام لەکاتی ئێشکگرتندا  ئەو کاتژمێرە  بەساڵێک دەچوو.  پاش کەمێک دەیان کۆپتەرهاتنەسەر مەیدانی شەڕەکەو ئەوان  بەتەقینی گولەی گڕدار  ئەو ناوچەیەیان کردە  چراخان و ڕۆژی ڕووناک . من هەرگیز باوەڕم نەدەکرد  بەعسێکان  ئاوا لەسەر کورد بێنەدەنگ ؟   ئێمە  داوامان لە جاشەکان کرد کە خۆیان  بدەن بەدەستەوە  و سوێندی "گۆڕی شەهیدانمان خوارد کە هیچیان لێناکەین"  ئەوان  بەردەوام بوون لەشەڕکردن  .من ووتم شەرم ناکەن  جاشێتی بۆ بەعس دەکەن کەئەو هەموو تاوانە بەرامبەر گەلەکەمان دەکات  ؟ لەوەڵامدا   جاشە دڕەکە ووتی : فەرقی چی یە ؟ ئێوەش جاشێتی بۆ ئێران دەکەن ؟   ئەوە ئەو وەڵامەبوو کە منی لەناخەوە هەژاند ، ڕاستە  ئێمە ئەو شەوە پازداری ئێرانیمان لەگەڵ نەبوو، بەڵام  پاسدار لەسایەی  ئێمەدا  لەهەموو ناوچەکە  تەراتێنی دەکرد . 

 دنیا ڕووناک بۆوە  ئێمە  گەڕاینەوە دەیان  تفەنگ و فیشيک و ڕومانە مان لەگەڵ خۆماندا هێنا ،  شەهیدەکانیش لەپشتی  ووڵاخەبەرزەکان نران و هەریەکەو بۆزێدی خۆی  گەڕایەوە ، شێرکۆ بێکەس  لەهۆنراوەیەکدا ئەم دیمەنەی جوان کردۆتە خامەیەکی ،  برینارەکانیش  بەرەو ئێران بەڕێ کران  . لەژێر پردێکی داماودا  دکتۆرێکی شۆڕش خەریکی تیمارکردنی  دوو پێشمەرگەبوو.  منیش وویستم بتڵێ خوێن بدەم ، کە خوێنیان دەویست ،  دکتۆرەکە لێی پرسیم "گروپی خوێنەکەت چییە "؟ ووتم وابزانم AB+

ووتی : بەوابزانم نابێت  دەبێ بزانیت  و دڵنیابیت ، منیش ووتم ڕاستە بەڵام چۆن بزانم ؟  بیرم کردەوە بەڕاستی ئێمە لەو چیایە خەریکی چیبووین ؟  ئاخر  زانینی گروپی خوێنەکەت دەتوانێت ژیانت پێببەخشێتەوە. من زۆرماندووبووم  لەگەڵ هاوڕێکانمدا  هەریەکەمان لەبن سێبەری دارێکدا  سەرخەوێکمان بۆ کرد ، بەرلەوە  فیشيکدانەکانمان پڕکردەوە لەفیشەک  ، پێمان وابوو کەڕژێم  لەتۆڵەی ئەو  ئابڕووچونەی ڕەنگە هێرش بکات . نازانم چەنێک خەوتم ؟ کەهەستام  ڕوانیم  چەند دیلێک سەرکزانە لەپەنای یەکەوە دانیشتوون ، منیش لێیان چومە پێشەوە لەناویاندا  پیاوێکی بەتەمەنم دی  سەروچاوی خۆڵاوی و ڕیشێکی تەنکی ماش و برنجی و دەموچاوێکی قوپاوی پێوەبوو دیاربوو جگەرە کێش بوو ، سمێڵەکانی زەرد ببوو لەبەر دوکەڵ ، دانەکانی شاش بوو چڵکن وەک خۆی و هیچ ڕۆحی بەبەرەوە نەمابوو  دەگریا  ، بەڕاستی زۆر ئازاری دام ، لێچومە پێشەوە و مەتارەی ئاوەکەم بۆڕاگرت و لێم پرسی "بریناری ئازارت هەیە" دەنگی گریانەکەی زیاتربوو  من دانیشتم لەبەردەمیا و باوکی خۆم بیرکەوتەوە و زۆر بەزەیم پیایداهاتەوە ، ووتم خاڵەگیان چیتە ؟ ووتی  دووکوڕم لەگەڵدابوو  شەو یەکێکیان  کوژرا و پێی ووتم  بەدایکم بڵێ  لێم ببورێت ، پاشان ووتی : باوکە پێم ووتی من نابم بەجاش ، نابم بەجاش ، چەند جارێک ئەمەی ووتەوە .  من نەم توانی ڕزگاری کەم  گولەلەسنگی دابوو سەری لەسەر ڕانم بوو کە گیانی دەرچوو. من چۆن لەخۆم ببورم ،پێم ناڵێیت؟   ئەوەش کوڕەکەی ترمە گولەیەک بەباڵێوەیە و زامارە  ، کەبەدەست ئاماژەی بۆکوڕەکەی کرد ، ئەویش سەری داخستبوو بەڵام بەلەفاف باڵیان بەستبوو گەرچی ئێسقانی شکابوو بەس زۆر ترسناکیش نەبوو برینەکەی .  من لەناوەندی ڕق و سۆزدا  مابومەوە ، نەم دەتوانی  لەوەبگەم کابرایەک بۆ  والەکوڕەکانی دەکات لەگەڵی چەک هەڵگرن ؟  قسەمان زۆرکرد  .

 باوکە جاشيکە  هێندە بەناسۆرەوە  باسی کوڕەکوژراوەکەی کرد،  منیش بیرم چووبۆوە کە پێشمەرگەم فرمێسکەکانم هاڕەی کرد و هاتەخوارەوە ، پاشکەمێک  هەڵیان ساندن و بەرەو  سەرکردایەتیان بردن وەک دیلی شەڕ  بەرەو بەرگەڵو کە زیندانی شۆڕش لەوێ بوو.  منیش لەدەفتەری یاداشەکەمدا  نوسیم " ئەمڕۆ بۆ مەرگی جاشێک  فرمێسکم ڕشت" .  کاتێک هاوڕێ  شەهیدم حەمە بی کەی سی  زانی  بۆ ئەو جاشەگریاوم  زۆر پێکەنی  ، منیش ووتم بیرتە  چوین بۆ سینەما سیروان لەفلیمە هندێکەدا  کاتێک منداڵەکە کەوتە بیرەکەوە و پاش کەمێک  مەمکە مژەکەی سەر ئاو کەوت  تۆچۆن گریایت؟    ئیتر بێدەنگ بوو ،  بەڵێ  لەچاوی ئەو باوکەدا  چاوێکی پڕ ئازارو پڕشنگدارم بینی ،  دڵێکی پاکو خاوێن ،  ئەو دەیزانی چ هەڵەیەکی کردوە و چەندە گوناح بارە؟ بەڵام   تازە  درەنگ بوو  نەی دەتوانی کوڕە کوژراوەکەی ببینێتەوە.  لەو ڕۆژەوە من بیرم دەکردەوە داخۆ دایکی جاشێکی کوژراو وەک دایکی پێشمەرگەیەک فرمێسک دەڕێژێت؟