منیش کاندیدم

15/04/2018, 23:06 (GMT+1)

منیش کاندیدم لەسەر لیستەکەی خۆتان لیستی( خیانەتکاران و ترسنۆکەکان).
دەنگم پێبدەن بۆ ئەوەی ئەم وڵاتەتان لەسەر پایەکانی درۆ، دزیی ، گەندەڵیی و نیشتمانفرۆشتن بۆ بنیادبنێمەوە و تەواوکەری پرۆژەی ئەندام پەرلەمانەکانی پێشوبم.

دەنگم پێدەن بۆ ئەوەی چارەکێکی تری موچەکانتان ببڕین و لەگەڵ هاوڕێکانما گەشتە تەواو نەکراوەکانی پێ تەواو بکەین .

بەڵێنتان پێئەدەم هەرگیز درۆتان لەگەڵدا نەکەم و پێش هەموو شتێک چەند دۆنمێک زەوی لەباشترین شوێنی شار بۆخۆم بکڕم و ڤێلایەک لە سەردیزاینی کۆشکە شاهانەییەکان بۆخۆم دروست بکەم .

دەنگم پێ بدەن با سەیارەکەم بگۆرم و کۆمەڵێک حمایە بۆ خۆم تعین بکەم هەر ئیشوکاری بازارو ماڵیان پێبکەم ، ئاخر کورەکەم پێویستی بەسایەقێک و دوو حمایە هەیە بۆ هێنانی و بردنی بۆ قوتابخانە.

دەنگم پێبدەن با زیرەکترین دکتۆرەکانی تجمیلتان بۆ تاقیکەمەوە.

دەنگم پێبدەن با پۆزتان بەسەردا لێبدەم، خۆم لێ ببێت بە غاندی و ماندێلا و حسابی هیچیش بۆ ئێوە نەکەم.

دەنگم پێدەن با کەرکوک بگەرێنمەوە سەر تورکیا وهەولێریش بۆ بەغدادی خوێن شیرین.
دەنگم پێبدەن با سلێمانی تەسلیم بە ئیران بکەم.

دەنگم پێبدەن با هەڵەبجە و ئەنفال لە بیرهەمووتان بەرمەوە .

دەنگم پێبدەن بەڵێن بێ هەرچی حکومەتی کوردی پێی نەکرا من پلان داڕێژەری بم بۆ فرۆشتنی ئەم بەشەی تری نیشتمان.

دەنگم پێبدەن، با ئیتر ماندو نەبم و تاقەتی سیاقەت و بەرپرسیارێتم نەماوە، ئەمانەم لە بەرخاتری خۆتانە دەنگم پێبەن لەمەزیاتر زەرەرناکەن.

دەنگتان ئەبێتەهۆی سەرخستنی لیستەکەی خۆتان... لیستی خیانەتکاران و ترسنۆکەکان.

دەنگتان خۆشگوزەرانی بۆ من دروست دەکات، ئێوە چش ئێوە ژیانتان ناوێ ئەی میللەتی خاوەن یادگەی کورت و لاواز.

............................................

کاندیدی خۆتان

یریڤان

ماستەر: پرۆفیسۆر لەناسینی جیناتی تۆ