بۆ ئەوەی ببینەوە بە خاوەنی خاک و نیشتیمانی خۆمان

لەسەردەمی ریفراندۆمەکەدا، کاتێک مەسعود بارزانی سواری سەری خۆی بوو، ئەو خیانەتە مێژووییەی لە کورد کرد، نە تورکیا و نە ئێران، لە پڕۆسەی دەنگدانەکاندا نقەیان لێوە نەهات، چونکە پلانی ریفراندۆمەکەیان داڕشتبوو، کە بەم خائینەیان جێ بەجێ کرد، تا کەرکوک و خانەقین و ناوچەکانی دیکە لە دەست کورد دەربهێنن، هەر لەو سەردەمەدا پارتییەکان و زۆربەی بەرپرسەکانی یەکێتیش کڵاویان کردە سەری کوردی ساویلکە، وایان پیشان دا، کە ئەم دەنگدانە بۆ سەربەخۆیی کوردستانە، ئیتر کورد رزگاری دەبێت و دەبێتە خاوەنی خاک و ئاڵای سەربەخۆی خۆی. لە دواییدا و پێش لەشکرکێشییەکەی حکومەتی عێراق بۆ سەر کەرکوک نەجمەدین کەریمیش ئاڵای کوردستانی لەسەر هەموو بینا حکومی و دەزگا فەرمییەکانی دیکە هەڵکرد، دوای کەمتر لە هەفتەیەک دایانگرتە خوارێ.

لەسەر ئەمە برادەرێک کاتی خۆی پرسیاری ئەوەی لێکردم! منیش وەڵامم دایەوە، کە کاتێک پێشمەرگەیەک لە بەرەی جەنگدا شەهید دەبێت، دوایی تەرمەکەی لە ئاڵایەکی کوردستانییەوە دەپێچن، بەمە دوا ماڵئاوایی لێدەکەن! ئەو ئاڵایەی، کە لە تەرمەکەوە دەپێچرێت، دەبێتە بەرگی ماڵئاوایی، ئیتر نابینرێتەوە، ئەوەی لە کەرکوکیش رووی دا، کە ئاڵای کوردستانیان لە سەر بینا حکومییەکانی کەرکوک هەڵکرد، دوایی لایانبرد. راگەیاندنی شەهیدبوونی کەرکوک بوو، دەسەڵاتی کوردی بە دەستی خۆی کەرکوکی شەهید کرد، چونکە هەڵکردن و داگرتنی ئاڵایەک نیشانەی وازهێنانە، نەک پێچەوانەکەی، ئەوان بۆیە ئەمەیان کرد، تا بەم شێوەیە ماڵئاویی لە کەرکوک بکەن، ئەگەر پێچەوانەی بۆچوونەکەم راست بێت، ئەوا نەدەبوو هەر لە سەرەتاوە ئاڵاکەیان هەڵبکردایە، بەڵام بۆ چەواشەکردنی خەڵکی ئەو واتایەی گەیاند، چونکە کاتێک کوردستانبوونی کەرکوکت بەلاوە گرنگ بوایە، دەبوو لە دوای راپەڕینەوە ئاڵای کوردستانت لە کەرکوک هەڵبکردایە، ئەگەر ئەمە داخوازی داگیرکەران نەبێت و پلان نەبێت، بۆ لەو کاتەدا ئەمەت کرد، کە دەتزانی ریفراندۆم سینارۆیەکە بۆ وازهێنان لە کەرکوک؟ بۆچی هاتیت بەو شێوەیە گوللەت نا بە سنگی کەرکوکەوە، دوایی ئاڵای کوردستانت تێوە پێچا!؟

ریفراندۆمیش هەر ئەو ئامانجەی هەبوو! کە پارتەکانی باشوور، کوردیان بەرەو رووی تراژیدیایەکی مەترسیدار کردەوە!

راستییەکی سروشتی هەیە، کە ناتوانرێت گۆڕانکاری تێدا بکرێت، ئەویش ئەوەیە، کە چۆن کەڵەشیر ناتوانێت هێلکە بکات، ئەوەندەش چاوەڕوان دەکرێت مەسعود بارزانی و سەرانی کورد واز لەو سروشتەی خۆیان بهێنن و بتوانن دەوڵەتی کوردی لە باشوور دروست بکەن. چونکە سروشتی بوونی ئەوان خیانەت وناپاکییە، لەوە زیاتر نابێت چاوەڕوانی پێچەوانەکەیان لێ بکەیت، ئەمان بەردەوام هەموو دەرفەتێک لە دەست دەدەن، کە کورد نەبێتە خاوەنی خاکی خۆی و ئازاد بێت، ئەزمونی مێژووی گەلان پێمان دەڵێت، کە کەڵک وەرگرتن لەو دەرفەت و رووداوە مێژووییانە، هەمیشە گەلێک بە زیندوویی دەهێڵیتەوە، لێ ئێمەی کورد، بە پێچەوانەوە لە رێگای ئەم پارتە کوردییانەوە، نائومێدتر دەبین و کارەساتەکان چۆکمان پێدادەدەن، ئەو هەموو خیانەتەی، کە ئەمانە بەرامبەر بە کورد دەیکەن، زۆر لەوە گەورەترن، کە هیچ نەتەوەیەک خۆی لە بەریدا ڕابگیرێت و چۆکی پێدانەدات.

کاتی خۆی رژێمی بەعس لە سوریا سیاسەتی پشتێنی سەوز و بە عەرەبکردن و نەهێشتنی کوردی لە سوریا، جێبەجێ کرد، هەرچی ناوی شارە کوردییەکانە کردبوویان بە عەرەبی، زۆربەی دانیشتووانیان راگواستبووەوە، عەرەبی زۆریان تێکەڵ بە کورد کرد. ناوی شارێکی وەک (کۆبانی) کرابوو بە (عین العرب)، ئێمە چونکە ئاگاداری جوگرافیا و مێژووی خۆمان نیین، زانیارییمان لەسەر خۆمان و نیشتیمانەکەمان نییە، گوێی پێنادەیەن و خەمی بەشەکانی دیکەی کوردستانمان نییە، چونکە بە هی خۆمانی نازانین، بۆیە کۆبانیمان نەدەناسی، بەڵام بەرەنگاربوونەوە و تێکشکانی داعش، شەڕی مان و نەمانی کوردانی رۆژئاڤا، ئەو راستییەی زیندووکردەوە. کە ئەو شارە کۆبانییە، نەک (عین العرب)، کوردانی رۆژئاڤا ئەو هەڵە مێژووییەیان راست کردەوە، بەڵام پارتی و یەکێتیی بەردەوام پێچەوانەکەی لە باشوور پیادە دەکەن. بۆیە لە پاشەڕۆژدا ئەگەر حکومەتێکی رەگەزپەرستی عەرەبی لە عێراقدا بیەوێت هەمان کار بکات، گەرەنتی نییە، کە کوردانی باشوور بتوانن داستانی وەکو کۆبانی تێدا بنووسنەوە، چونکە دەسەڵاتی کوردی و پارتەکانی باشوور لە دەرەوەی کوردبوونمان کار بۆ خۆیان و داگیرکەران دەکەن، چارەنووسی سلێمانی و هەولێر و دهۆکیش لە موسڵ و کەرکوک خراپتر بەسەر کورددا دەهێنن.

لە کۆتاییدا بۆ گەڕانەوەی هەر بستێک لە خاکی کوردستان دەبێت داستانی دەیان کۆبانی بنووسرێتەوە، بۆ ئەمە پێویستمان بە عەقڵی حاجی حسێنەکانە، بۆ ئەوەی لە دەستمان چووە ، وەریبگرینەوە، نەک بە عەقڵی بەرپرس و سەرکردەکانی باشوور.

کوردی باشوور تا خاوەنی ئەم بنەماڵە و بەرپرس و پارتانە بێت ناتوانێت داستانێکی وەک ئەوەی کۆبانی لە باشووردا بنووسێتەوە.