ئەگەر بەم شیکارییە واقیعی و فەلسەفییەوە سەیری دروشمەکەی ئۆجەلان بکەین، دەتوانرێت بەم شێوە ترسناکە بخوێندرێتەوە، کە:

"تێڕوانینی حیزبەکەم بۆ من حەقیقەتە، من بە دەمارگیرییەوە عاشقی ئەم حەقیقەتەم، کە ئۆجەلان لە پەنجەرەی ژورەکەیەتەوە دەیبینێت و ئازادی تەنیا لەناو قبووڵکردنی ئەم حەقیقەتەی ئۆجەلاندا هەیە، بۆ سەپاندنی ئەمەش، تێکۆشان دەکەم بۆ سڕینەوە و لەناوبردنی هەموو ئەوانەی جیاوازتر بیر دەکەنەوە!"

هەر ئەمەشە کە کورد بەردەوام لە شەردا ئەگەر براوە بووبێت، بەلام لەسەر مێزی گفتوگۆ دۆراندوویەتی، جونکە شوێنکەوتوانی پارتە کوردییەکان، سەرکردەی پارتەکان هەمیشە فێڵیان لە خەڵکی کردووە، دەستیان لەناو دەستی دوژمندا بوو، کوردستانیان وەکو دوکان و بازاڕێک بینیوە و خوێنی کوردیان وەکو کەرەستەی فرۆشتن مامەلە کردووە، کورد هەمیشە لەبەر دەم ئەو سەرکردە و رێبەر و پارتانەدا وەک مەڕ باڕاندوویەتی، بیری لەوە نەکردۆتەوە، کە لە پێستی مەڕبوونی خۆی دەربچێت و خۆی بڕیاری خۆی بدات، جگە لەوە هەموو وا پەروەردەکراوین، کە لە دەرەوەی بوونی خۆمان وەک کورد بە سۆزەوە بکەوینە نێو یارییەکی نێودەوڵەتییەوە، وامان کردووە بۆ بەرژەوەندی دەوڵەتان بەڕێوە بچین (نموونەی تەسلیمبوونەوەی ڕۆژئاوا)، چونکەلە ناوخۆشماندا باوەڕمان بە فرەپەنجەرەیی و ڕێژەییبوونی حەقیقەت نییە. بۆیە تا ئەو کاتەی کورد واز لەم عەشقە دەمارگیرانەیە نەهێنێت، خوێنڕشتن بۆ "ژیانی ئازاد" بەردەوام دەبێت، بەڵام بەرهەمەکەی هەمیشە خراوەتە گیرفانی داگیرکەرانەوە، سەرکردە و رابەرەکانیشمان ورگیان زلتر و گیرفانیان پڕتر کردووە.