هەموو شتێک بن تەنها کورد مەبن

لە ماوەی چەند ساڵی ڕابردوودا هەندێ ڕەوتی سیاسی، بە تایبەتی ئاپۆچیەکان و ئیسلامیی سیاسی، هەوڵیان داوە چەمکی "نەتەوەپەرستی" و "دەوڵەت ـ نەتەوە" وەک مەترسی و تۆقێنەر بناسێنن. بە شێوەیەک کە وا پیشان بدرێت هەر کەسێک داوای مافی نەتەوەی خۆی بکات یان خواستی دەوڵەتێکی نەتەوەیی هەبێت، ئەوا  بە تۆقێنەر و شۆڤێنیزم و توندڕەو و ترسناک تاوانبار دەکرێت.

وامان پێ دەناسێنن کە گەر نەتەوە پەرست بیت و خواستی دەوڵەت نەتەوەت هەبێت ئەوا تۆ هۆلۆکۆست دەقەومێنیت لە کاتێکدا چ ئۆجالان وەک دژەنەتەوەی کورد و چ ئاپۆچیش وەک پەیڕەوانی ڕەتکەرەوەی دەوڵەت نەتەوە سەرەواوێک لە نەتەوەپەرستی کورد تێنەگەیشتوون.

- نەتەوەپەرستی پێش هەر شتێک پاراستنی ناسنامەی نەتەوەیە کە پێکهاتەی " زمان، فەرهەنگ، مێژوو و بوونی گەلێکە " مێژوو سەلماندوویەتی کە هیچ نەتەوەیەک بەبێ هەستی نەتەوەیی نەیتوانیوە خۆی بپارێزێت و لە بەرامبەر سیاسەتەکانی سڕینەوەدا خۆی بگرێت ، هیچ نەتەوەیەک بە بێ نەتەوە پەرستی نەیتوانیوە بۆ سەد ساڵ بەرگە بگرێت مێژووش ئەوەی سەلماندوە .

نەتەوەپەرستی لە کاتێکدا مەترسیدار دەبێت کە مرۆڤ خۆی بە گەورەتر و زیاتر لە خەڵکی تر بزانێت ، بەڵام هەستی نەتەوەیی بۆ پاراستنی ناسنامە شتێکی سروشتییە

بۆیە گەر بکۆڵینەوە لە نەتەوە پەرستی ئەوا بۆمان دەردەکەوێت کە کورد کە هەزاران ساڵە لەژێر سەرکوتکاری و زەبر و زەنگ ماوەتەوە و ملی کەچ نەکردوە و چ تەعریب و چ تتریک و چ فارسیک نەیتوانیوە کوردێک لە پێناسی خۆی داماڵێت و هەردەم بەرهەڵستکار بوە و خۆی بە هیچکام لەو نەتاوانە نەبینیوە لەوەیە خۆیان هەستی پێنەکەن بەڵام ئەوە نەتەوە پەرستیەتی کوردە کە وای کردوە کورد نەتوێتەوە

دەوڵەت ـ نەتەوە ئامرازێکی سیاسیی یاخوود ئالیەتێکی نەتەوەپەرستەکانە بۆ پاراستنی بوون و بڕیاردانی نەتەوەیەک ، لە جیهانی ئێستادا زۆربەی دەوڵەتانی دنیا ، بە جیاوازیی سیستەمی سیاسییەکانیان ، لەسەر بنەمای دەوڵەت ـ نەتەوە دامەزراون هەندێکیان دیموکراتین ، هەندێکیان دیکتاتۆرین، هەندێکیان ئایینین و هەندێکیان سیکولارن، بەڵام هەموویان لە کۆتاییدا بەرگری لە بەرژەوەندی و ناسنامەی نەتەوەی خۆیان دەکەن.

هەر نەتەوەیەک کە لە ژێر ستەمدایە، پێویستی بە هەستی نەتەوەیی هەیە بۆ ئەوەی خۆی لە سڕینەوە بپارێزێت .

بۆیە کاتێک کورد داوای دەوڵەتێکی نەتەوەیی دەکات، ئەوە شتێکی نامۆ نییە ، بەڵکو داواکارییەکی سروشتییە کە هەر نەتەوەیەکی تر پێشتر بەدەستی هێناوە.

دووبارە ئاشناتان دەکەمەوە بە چەمکی دەوڵەت نەتەوە ،  دەوڵەت نەتەوە ئەو پێناسە تۆقێنەرەی نیە کە ئاپۆچیەکان ئیدیعای دەکەن بەڵکو ئالیەتێکی نەتەوەپەرستە کە تیایدا تاکی نەتەوە پەرست خۆی نمایش دەکات و سنگ دەردەپەڕێنێت کە ئەویش وەک هەر نەتەوەیەکی تر خاوەنی کیان و ژیان و جوگرافیای خۆیەتی و لەسەر مێزی گەورەکان دەتوانێت خاوەن بڕیار بێت ، هەر بۆیە کاتێک کوردپەروەرێک دێت و دەیەوێت نەتەوەپەرستێک بێت و خواستی دەوڵەت نەتەوەی هەبێت ، دوژمنان و نەیارانی کورد دێن و کۆمەڵێک کەس و فکری جیات بۆ دەهێننە پێش تا بە ژێر دەستەیی بتهێڵنەوە نموونەی حەسەن خەیری و ئۆجەلان و پارتەکەی و تەڤگەرەکەی کە دێن و نەتەوە پەرست بە شۆڤێنی و دەوڵەت نەتەوە بە سڕەرەوەی دەوڵەتانی تر و نەتەوەکانی تر دەناسێنن و وەک هێزێکی تۆقێنەر و ترسێنەر لە کاتێکدا دەوڵەتانی دنیا بە دیموکراتی و دیکتاتۆری و ئیسلامی و عەلمانی و چەپ و هتد .. هەموویان دەوڵەت نەتەوەن و هەموویان تاکەکانی نەتەوە پەرستن

- نەتەوەپەرستی ڕادیکاڵ یاخوود توندڕەو

نەتەوەپەرستی و شۆڤێنیزم یەک نین

پێویستە جیاوازییەکی ڕوون لەنێوان نەتەوەپەرستی و شۆڤێنیزمدا بکرێت

شۆڤێنیزم ئەو بیرکردنەوەیەیە کە خۆی بە زاڵتر لە نەتەوەکانی تر دەزانێت، مافی ئەوانی تر ڕەت دەکاتەوە و هەوڵی داگیرکاری و و پاوانخوازی و سەپاندنی ناسنامەی خۆی دەدات.

ئەم جۆرە لە نەتەوە پەرست ئەوانەن کە خواستی داگیرکاری و پاوانخوازیان هەیە و هەموان لە ناوخۆیاندا دەسڕنەوە و نەتەوەیەکی دیاریکراو دەکەن بە ئەساسی مرۆڤایەتی و کەسیان قبوڵ نیە و هەردەم خۆیان بە پێرفێکت و بێ خەوش سەیر دەکەن و خواستیانە هەموو نەتەوەکانی دیکە لە خزمەتی خۆیاندا ببینن

ئەوانەی پەیڕەوی ئەو جۆرە بیرەن بریتین لە ڕەوتە شۆڤێنیەکانی ناو هەریەک لە (تورک ، فارس ، عەرەب ، ئیسرائیل ، ئیتاڵی ، یابانی ، چینی).

بینیومانن کە ئەم نەتەوانە چیان کردوە و چۆن جینۆسایدی نەتەوەکانی دیکەیان کردوە .

بەڵام نەتەوەپەرستی کورد جیاوازە و لە جۆری میانڕەوە بەو واتایەی کورد نەتەوە پەرستە کە ستەمی بەرامبەر دەکرێت و دەیانەوێت بیسڕنەوە ئەگین لە کاتی ئارامی و پێکەوە ژیان ئەو بەرگە لە بەری دادەکەنێت نموونەی سەربازێکە کە لە ژیانی پێش جەنگ جووتیارێکە بەڵام کاتی جەنگ سەربازە و  جلی سەربازی لەبەردەکات لە دوای تەواوبونی جەنگ جلەکانی دادەکەنێت و دەگەڕێتەوە سەر کارەکەی پێشووی ، نەتەوەپەرستی کوردیش هەمان شێوەیە

بە کورتی نەتەوە پەرستی کورد نەتەوەپەرستێکی بەرگریکارە کە دەیەوێت نەتەوە و کلتور و زمانی خۆی بپارێزێت نەک نەتەوەپەرستێکی هێرشبەر و توندڕەو کە ئەوانی دی بسڕێتەوە  .

نەتەوەپەرستی لە هەناوی ستەمەوە درووست دەبێت و پێداگری لەسەر دەوڵەت نەتەوەی میللەتێک لەسەر ئەساسی داننەنان و پێداگری دوژمنان لەسەر داگیرکاری و سڕینەوەی تۆی کورد دروست دەبێت

ئەگین گەر بگەڕێینەوە و چاو بە مێژوودا بخشێنین بۆمان دەردەکەوێت کە کورد هیچکات نەتەوە پەرستێکی توندڕەو نەبوە لەگەڵ هەموان دانیشتوە و بێ ئەوەی چاوی لە ماڵ و سامانی هیچ نەتەوەیەکی تر بوبێت ، بۆیە کاتێک ئەم دەستەواژانە درووست بون وەک " نەتەوەپەرست و دەوڵەت - نەتەوە" بەو هۆکارانەی پێشوو کە باسم کردن دروست بون

کوبا و چین و ڕووسیا و کۆریا کە عەرابی ئاپۆ و ئاپۆچیەکانن لە پەیڕەوی ڕەوتی کۆمۆنیستی دەوڵەت نەتەوەن و نەتەوە پەرستیشن ، فەرموون کەسێک بە کۆریەک بڵێت تۆ کوردیت یا تورکیت یا عەرەبیت یاخوود بە کۆریەکی باکور بڵێ تۆ کۆریەکی باشووریت و بە پێچەوانەوە هەرگیز لێت قبوڵ ناکات ، بە دیموکراتیترین دەوڵەتی دنیا بڵێ ئێوە ئەو نەتەوەیە نین و ئێوە کوردن بزانن قبوڵی دەکات ؟؟

هەر بەوەدا بزانن کە ئۆجالان و پارتەکەی پڕۆژەی میتی تورکن کە دەڵێن ئێمە دژی دەوڵەت نەتەوە و نەتەوەپەرستین بەڵام لە هەمانکاتتدا  ئۆجالان داوامان لێدەکات بە پشت بەستن بە چەمکی کۆمەڵگەی دیموکراتی کورد لە ناو دەوڵەت نەتەوەی تورک و لەگەڵ نەتەوەپەرستانی تورک ئینتیگراسیۆن بکەین

مرۆڤێک کە ناسنامەی خۆی ون دەکات، بە شێوەیەک لە شێوەکان بوونی خۆشی ون دەکات

ئەوە ئۆجالانە ئەوکاتەی ووتی دایکم تورکە ناسنامەی خۆی وون کرد و ئێستاش بە شێوەیەک لە شێوەکان خۆی وونکردوە و دەیەوێت کوردیش بەرەو ونبون ببات .

هەندێ بیرۆکە، بە ناوی «کۆمەڵگەی دیموکراتی» یان «ئینتیگراسیۆن»، هەڵگران و شوێنکەوتوانی ئەم چەمکە هەوڵ دەدەن کورد لە ناو سیستەمی دەوڵەتانی داگیرکەردا بتوێننەوە. واتە لەبری ئەوەی دەوڵەتەکان ناچار بکرێن مافی کورد بناسێنن، کورد بانگهێشت دەکەن خۆی لەگەڵ ناسنامە و زمانی دەوڵەتە داگیرکەر و پاوانخوازەکان بگونجێنێت.

جوان دیقەت بدەن لەم دێڕە " کورد لە ناو دەوڵەت نەتەوەی تورک و لەگەڵ نەتەوە پەرستانی تورک ئینتگراسیۆن بکەین " واتە خۆمان لە کلتور و زمان و فەرهەنگی جوانی کورد داماڵین و خۆمان لەگەڵ کلتور و فەرهەنگ و زمانی دوژمنان و داگیرکەرانی کورد بگونجێنین،

فەرموو گەر ئۆجالان ڕاست دەکات و دەوڵەت نەتەوە مەترسیە و نەتەوەپەرستی باوی نەماوە با ڕوو بکاتە تورک و تورکیا و بڵێت ئەی نەتەوەی تورک و دانیشتووی دەوڵەت نەتەوەی تورکیا وەرن ئینتیگراسیۆن لەگەڵ کورد بکە و دەوڵەتەکە کە ناوی تورکیایە بگۆڕە بە ناوێکی دیکە کە مۆرکی نەتەوەیەکی دیاریکراوی پێوە نەبێت ؟؟

لەبەر ئەوەی ئەو نەهاتوە تورک و ئەقڵیەتی شۆڤێنی تورک بگۆڕێت بەڵکو تورک هێناویەتی کورد و ئەقڵیەتی بەرەنگاری و یاخیبونی کورد و قبوڵنەکردنی ژێردەستەیی داگیرکەرانی تورک لە مێشکماندا بگۆڕێت و بمانکات بە ژێردەستە و تواوە و سڕاوەی پەڕەکانی مێژوو ، بۆیە ئۆجالان و پارتەکەی و پەیڕەوانی ئەو پڕۆژەیەی میت دەبێت لەوە تێبگەن کە کورد داوای سڕینەوەی کەس ناکات، بەڵکو داوای ئەوە دەکات خۆی نەسڕدرێتەوە. ئەوەش مافی سروشتی هەر نەتەوەیەکە

کورد هێندە جوانە تەنانەت نەتەوەپەرستی و خواستی دەوڵەت "  نەتەوەییەکەشی جیاوازە لە هەموو نەتەوەکانی جیهان "