دەبێ وریابین تورک گۆڵێکی تری وەک گۆڵی ئۆجەلانمان لێ نەکات!

لە یەکەم ڕۆژ لە باكووری كوردستان ڕەوتێك بە ناوی ھاڤبەندی، هاوپەیمانێتییەكیان لە شاری ئامەدی باكووری كوردستان ڕاگەیاند بە سروودی ئەی ڕەقیب و بەئاڵای كوردستانەوە و داوای دیاریكردنی مافی چارەی خۆنووسین بۆ كورد لە توركیا دەكەن، من لە یەکەم ساتدا گومانم بۆ دروست بوو کە چۆن جەندرمەکانی تورک هێشتویانە ئەو کۆبوونەوەیە بکرێت و تەواو بکرێت؟!
جارێکیتر دەیڵێمەوە ئۆجەلان گەورەترین گۆڵی تورک بوو لە کورد بکرێت لە مێژوودا. توانیان لە ڕێگای ئۆجەلانەوە ٤٠ ساڵ قوربانی بە گەنج ولاوی کورد بدەن گوایە لە پێناو مافی کورد، کەچی دوایی بە دەستی ئەو کوردەی دەستنێژی خۆیان دەستبەرداری ھەموو مافێک بوون، ڕازیشبوون خەباتگێڕان و شەھیدانی کورد بە تیرۆریست ناوزەد بکرێن، جەندرمە بۆگەنەکانی تورکیش بە شەھید!
بێگومان دەکرێ سەبارەت بە دروستبوونی ئەو ڕەوتە نوێیەی کە دژی ڕەوتی ئاپۆچیەت دەردەکەوێ، خەڵکی تریش ئەو گومانەی لا دروست بووبێ وەک من، بە تایبەتی کە ڕووداوەکە چەندین ڕۆژی بەسەردا تێپەڕبوو، بێ کاردانەوەی ئەو تورکانەی کە ڕازی نابن کورد لە مۆبایلەکانیشیانەوە سروودی نیشتیمانی کوردی و ئاڵای کوردستان ھەبێت!
من ڕەنگە گومانم لە شێوازی سەرھەڵدانەکە ھەبێ نەک لە خودی ڕەوتەکە. چونکە من دڵنیام دروستبوونی ڕەوتێکی کوردستانی و کوردپەروەر پاش ھەڵھێنانی ھێلکە پیسەکانی ئۆجەلان، بۆتە حەتمیەتێکی جەماوەری و مێژوویی، ئێستاش ناڵێم ئەوانەی ئەو کارەیان کرد پیاوی خراپی تورکن، نەخێر. من تەنھا لەبەر قەبارەی ئەو خیانەتە گەورەیەی لە کورد کرا بە دەستی ئۆجەلان و پکک، دەڵێم تورک وەک چۆن ئۆجەلانیان دروست کرد بۆ وەڵامدانەوەی ئاواتی کورد لە سەربەخۆیی، وەک چۆن لە سەرەتادا ئۆجەلان داوای سەربەخۆیی ھەموو کوردستانی دەکرد بە ھەر چوار پارچەیەوە، دوایی وای لێھات تەنازول لە مافی کلتوریش بکات! دوور نییە ئەو تورکە وریا و شەیتانە جارێکیتریش ھەوڵدات فێڵ لە کورد و مێژووش بکات، بە دروستکردنی ڕەوتێکیتری کوردی لە ناندینی موخابەراتی میت ی تورکی، بە تایبەتی دەزانێ زۆرینەی ڕەھای کوردانی باکوور بە تایبەتی چەندە پڕن لە تەنازولات و خیانەتەکانی ئۆجەلان.
ئێستا بەگوێرەی ژێدەرە هەواڵییەكان لە باكووری كوردستان دەسەڵاتدارانی دەوڵەتی توركیا سەركردە و ڕێبەرانی هاوپەیمانێتییەكی كوردییان دەستگیركردووە كە تەنها چەند ڕۆژێكە پێكهاتووە.
سەركردە و ڕێبەرانی پارتی سۆسیالیستی كوردستان، وڵاتپارێزان و پارتی دێمۆكراتی باكووری كوردستان لەگەڵ چەند لایێنكی دیكە دەستگیركراون.
بێگومان وەک چاوەڕوانە ئەو خۆ جاڕدانە لەگەڵ شەپۆلێكی ڕەگەزپەرستی تورکی ئاسایی ڕووبەڕووبووە، چونکە تورک لەسەر ئاستی دەوڵەتی قووڵ و ژوورە تاریکەکانی موخابەرات کاری خۆیان دەکەن، خۆ ناچن هەموو پیلانەکانیان بە خەڵکی تورکی ئاسایی بڵێن؟! وەک ئێمەی کورد غەریب حاڵ و بێ نھێنی نین!
سەرهەڵدانی ئەم ڕەوتە نوێیە لە توركیا لە ڕووکەشدا وادیارە لە دژی ئاڕاستەی عەبدوڵا ئۆجالان و دەم پارتی و پەكەكەیە و دژی پرۆسەی خۆبەدەستەوەدان و ئەنتیگراسیۆنن، خوازیاری مافی نەتەوەیین و ئاڵای كوردستانیان هەڵكردووە، لەحاڵێكدا پەکەکە و دەمپارتی بەتەواوی چوونەتە ژێر ئاڵای توركیا و لە پێناو برایەتی تورك وکورد ئامادەن دژایەتی ئەمریکا و ئیسڕائیل و جیهان بکەن، تورکیش بەرتیل دەدات لە پێناو ڕازیکردنی ئەمریکا و ئیسڕائیل!
من سەرهەڵدانی ڕەوتێکی بەهێزی کوردپەروەر بە حەتمیەتێکی مێژوویی دەبینم، بەڵام دەبێ زۆر زۆر وریابین نەهێڵین تورکی ئاوقات گۆڵێکی تری وەك گۆڵەکەی ئۆجەلان و پکک مان لێ بکەن. ئێمەی کورد بەخوا یەک لە سەدا وریایی و فێڵبازی تورکمان تێدا نییە، زۆرجاران کوردم وەک مرۆڤێکی پەککەوتە و کەمئەندامی عەقڵی ژێردەستی تورکم دێتە بەرچاو! بەڕای من هەر مرۆڤی تاک کەمئەندام نابێ نەتەوەش هەیە کەمئەندامە وەک خۆمان!











